Het waas eine rare aovendj de väörige waek woonsdig. Ich haaj mich op het lètste moment väör de tv gezatte väör nao het Nederlands èlftal te kieke. Eigelik haaj ich get baeters te doon. Mer ich wool het debuut zeen van oze noewe trainer, Frank de Boer. De man dae mèt ein chagrijnig gezicht gebaore is, sjtraoldje neet oet det hae blie waas mèt zien noew baan. Mer doe moogs neet aafgaon op de boetekantj, bliesjap kan ouch van binne zitte, weit ich oet ervaring. Wie ich lang geleje in Wiërt de Veldeke Pries kreeg en nao het podium leep, zag eine bekindje oet Haerle: 'Allei Frits, lach èns.' Ich bedoel mer. Ich waas hiel gelökkig mèt miene pries, mer leet det van de boetekantj neet zeen. Det zitj neet zoeë in mich. Het kumtj ouch ómdet ich neet väör aansjtèller versjlete wil waere. Aansjtèllers zuus se allewiel zoeë väöl op de tv. BN'er die zich gedrage wie ónnuezel wichter of nog erger.
Efeng, Frank de Boer keek väör het begin van de wedsjtried al zörgelik. Det kós natuurlik sjpanning zeen. Of sjpiet det hae neet alle groeëte sjterre kós laote sjpele. Mer gauw genóg zoog ich nog ein anger raeje väör ziene duustere blik. Nederlandj sjpeeldje taege Mexico, ein landj mèt väöl gooj sjpelers: sjnel, hel en zoeë sjlouw wie de duvel zien grootje. Daobie haje de Mexicane ein geheim waope in het veldj opgesjtèldj, eine foetballer dae de sjterre van de hemel sjpeeldje en edere Hollenjer sjrik aanjoog. Allein al vanwaege ziene naam: Jesús Corona.
Probeer mer èns good te foetballe taege eine taegesjtenjer dae hètj nao de Zoon van God en dae kan raekene op extra hulp van baove. Toch waas de väörnaam neet het ergste. De achternaam van Jesús waas het groeëtste waope. Corona! Geine Hollenjer dors Jesús echt aan te valle as hae de bal haaj. Ze bleve braaf op angerhalve maeter bie hem oet de buurt. Het bezörgdje uterlik van Frank de Boer waas daomèt in eine kier verklaordj. Deze wedsjtried waas väör hem neet te winne. Of hae haaj Trump mótte opsjtèlle.
2020, waek 42
