Riek waere mèt gater. Neet mèt ein koel in de haof woeë Piere Knoops het äöver haet in ein van zien bute. De advertentie woeë hae det gaat mèt te koup zitj, wil ich uch aeve good neet ónthaoje.
Oet de kop: ‘Gat te koop. Zo goed als nieuw!’ Knoups is eine humorist en taalkunstenier woeë ich väöl van höb gelierdj. Det höb ich neet van de miens dae riek is gewaore van het saort gaat woeë ich het äöver höb. Ich weit neet èns waem det is.
Ich bedoel: de oetvinjer van gater in noew kleier. Ierst in sjpijkerbókse, allewiel ouch in anger saorte good.
Mèt opzèt gater make in modegerei. En det väör väöl geldj verkoupe. Det is gein kolderbuut van Knoops. Het besjteit echt. Winkels hange vol deur, noew kleier die d’r aafgedrage en versjlete oetzeen. Asof emes van eine riejendje moter is gevalle en zeker hóngerd maeter mèt die kleier äöver de asfalt is gesjroeveldj. In het begin keek ich altied mèt ein sjael oug of de draeger van zón verenneweerdje sjpijkerbóks litteikens ónger die gater haaj.
Ouch haaj ich kómpassie mèt degene dae die kapotte bóks mós drage. Det dae te erm waas väör zich ein noew bóks aan te sjaffe. Het doerdje effe väör ich door haaj det die gater niks äöver ermood zègke, mer alles äöver waeldje. Äöver de riekdom väör dich de luuks te kinne permittere deur en kapotte kleier aan te sjaffe.
As det gerei aafgedanktj is, kins se d’r niks mier mèt. Zelfs neet as wèrkkleier gebroeke. In ein bóks vol gater sjtrieks ze dich flink oet mèt vèrve of wèrke in de haof. Weggaeve aan ein good doel? Vergaet het mer. Dao kwoom ein kinnis van ós pas achter. Ze haaj zich de bein ónger de vot oetgeloupe väör kleier in te zamele väör Afrika.
Häöre trots wore tiën zek vol modern sjpijkerbókse. Die waerdje neet in dank óntvange. Ze kreeg zelfs eine nuetelike mail: ‘Het zal good bedoeldj zeen, mer we veule ós beleidigdj. Ouch de ermste miense meuks se hie neet blie mèt uer kapotte fóddele.’
2018, waek 20
