ColumnsFrits Criens

Column Modertaal: KALENDER door Frits Criens

Midden Limburg

Loupe waas lang geleje väör miense de enige mäögelikheid väör zich äöver langere aafsjtandj te verplaatse. Allewiel is loupe sjteeds mier ein maneer väör de gezóndjheid of de conditie op peil te haoje. En natuurlik ouch ein vorm van óntsjpanning. Det hètj dan wanjele. Adam en Eva wore de iërste wanjeliers. Waat höbbe die twië klutsköp ós aangedaon mèt häöre appel. Op 14 juni wore Ellie en ich mèt eine vrindj in Noorbeek väör te wanjele. Ein groeët sjtök door Belsj, mer ouch flink wied door oos provincie. De natuur waas prachtig. Mer de sjtildje mook de meiste indrök op mich. Dae daag veuldje ich pas waat Adam en Eva väör ós höbbe verkloeëtj.

 

Ein routebesjrieving haje we neet nuedig. Oze vrindj kós wörkelik eder paedje en wis precies woeë ein sjtegelke zooj kómme. In de loup van jaore haaj hae vrundsjap gemaaktj mèt väöl miense in die buurt, väöral boere. Zoeë kwome we neet allein alles te weite äöver de natuur in het gebied, mer ouch äöver de historie en gebroeke in de versjillendje dörpe dao. Äöver de regionaal conflicte tösse burgers en óngernummers, soms veroorzaaktj door wetgaeving in twië versjillendje lenj. We liërdje äöver boere die betaaldj waere door de regering väör häör landj ecologies te behere. Trök dus nao mier aevewicht tösse mienselike activiteite en natuur, zónger kunstmèst en gifsjpuit.

 

Oze gids vertèldje det eine van zien boerevrunj ein groeët deil van zien landj neet inzejdje mèt krotte of maïs, mer mèt graas. Mer... det moch hae van het ministerie pas vanaaf 15 juni mejje. Efkes later zoge we eine boer dae mèt de graasmejjer achter de traktor bezig waas: de vrundj van oze gids! 'Kóm mèt,' zag dae. 'En aeve niks zègke.' We lepe het veldj op, de boer zat de traktor oet en kwoom nao ós haer.' De gids sjtèldje ós väör. 'Mevrouw wèrktj väör het ministerie,' zag hae. 'Ze constateerdje net det se eine daag te vreug aan het mejje bès.' De boer versjödje gein oeër. 'Het sjpietj mich, mevrouw Criens,' zag hae. 'Lichtelik höb ich per óngelök op de Belzje kalender gekeke.'

 

2022, waek 25

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.