Tot väör kort waerdje jónges op väöl gebiede hoeëger aangesjlage as maedjes. Ómdet ze mier kanse krege, kwome ze vanzelf op de bèste plaatse te zitte. Haje ze mier macht, verdeendje ze mier geldj. Het zal waal in de Biebel sjtaon det God het zoeë haet bedoeldj, mer het dougtj neet. In oos cultuur is det óngersjied gelökkig aan het verdwiene.
Dao zorge de vrouluuj zelf waal väör. Ze pakke op alle gebiede de plaats die häör toekumtj.
Damesfoetbal beväörbeeldj. Ein paar jaor geleje waas het eine ónbekindje tak van sjport. Kóste 'kinners' wie Van der Gijp en Derksen op de tv foetbalsters nog belachelik make. Want foetbal waas natuurlik eine echte mannesjport. Dao haje vrouluuj niks te zeuke.
Die kinners krege de dèksel väör het ierst op de naas wie het Nederlands damesèlftal Europees kampioen waerdje. Mèt ein vrouw as coach, Sarina Wiegman. De vazele kal van die kinners waas van de zomer gans aafgeloupe wie oos dames twiëdje van de waereldj waerdje. We zeen nog neet van het sukses van de oranje Liëwinne bekómme, of de dames zitte de wielrenwaereldj op de kop. Waas fietse väör vrouluuj neet allein bedoeldj väör boeëdsjappe te doon en kinjer nao sjoeël te bringe? En wielrenne, waas det neet allein weggelagdj väör sjtoer kaerels? Manne mèt karakter, bikkelhèl en väör de doeëd neet bang? Nae dus. In Italië beweze de dames weer èns, mèt Annemiek van Vleuten väörop, det vrouwluuj op de fiets neet óngerdoon väör manne.
En waat te dinke van het lètste mannebolwerk woeë de vrouwe vanaaf de väörige waek volwaerdig in mèttèlle? De sjöttewaereldj. Good, ein ettelike jaor geleje kwoom bie Sint Agatha in Haelen het ierste dames-OLS van de gróndj. Mer alles bie-ein moke de hiëre in dae waereldj op alle fronte de deenst oet. Ónger de sjeetboum zeen de verhoudinge angers kómme te ligge. Sint Willibrordus oet Meijel waas zoeë sjlum väör in zien zèstal de sjötterstalente van veer dörskes in te zitte. Het resultaat is bekindj. Het gevolg is te väörsjpelle: anger vereiniginge gaon Meijel nao-ape. De waereldj zal noeët mier hetzelfdje zeen. Gelökkig mer.
2019, waek 30
