Mien vader waas eine Bögkemer. Wie hae en mam nao de aorlog wole trouwe waas d'r groeëte wueningnoeëd. Ze kóste ein hoes kriege in Haelen, Ónger de Wieje. Nou ja, ein hoes. Eine kleine raam mét daonaeve ein väördäör. Dao loog ein akelige dónker sjeur aan vast, zónger leecht. Die leep door tot driekwaart van de deepdje van het hoes, geliek mét de woeënkamer die ouch käöke waas. Achter die kamer en sjeur loge twië sjlaopkaemerkes. Toen wore mien aojers al blie det ze zoeë get haje. Ein paar jaor later waerdje ich as aodste van häör drie kinjer gebaore. Op miene viefdje verjäördaag zeen we verhoesdj nao ein noew hoes aan de Roggelsewaeg det pap en mam mèt hel wèrke en zunig laeve bie-ein haje gesjpaardj. Dao is mien zöster zaliger gebaore, mien broor waas d'r Ónger de Wieje al biegekómme.
Hóngerd maeter wiejer, richting dörp, loge de puinhuip van de opgeblaoze kérk. Ónger de Wieje waas eine hoebelige, helle zandjwaeg. Dao loge ein sjtök of zeve, acht väöral ermeujige hoezer aan. As het raegeldje mós ich tösse de peul water door sjlalomme väör drueg veut te haoje. Väör oos hoes loog ein braok sjtök gróndj mèt sjmeeldje en kanadaas buim, dao-achter de Haelese baek. Óngevier recht väör oos däör leep ein paedje nao het Kwietjes Brögkske. Daoäöver ging werkvolk, meist te voot, nao de rinkaove aan de Riekswaeg. Paerd en ker kóste d'r neet äöver, dao waas het brögkske te sjmaal väör.
Achter de hoezer van De Wieje ging het hiël hel ómhoeëg nao de Nunhemse waeg. Het raemke van mien vóchtig sjlaopkaemerke waas zoeë liëg det ich as kind äöver de raamdörpel van binne nao boete kós sjtappe. As het sjtortraegeldje en het water guutsdje mèt geweldj van de berg aaf, zatte ze bie ós naeve de achterdäör en de väördäör aop zoeëdet het water door het hoes rechtstreeks nao de baek leep. Eigelik haaj ich get wille vertèlle äöver mien vader en zien Bögkemse kammeräöj die Ónger de Wieje op bezeuk kwome. Väöral äöver häör taalgebroek. Det doon ich dan de volgendje kiër.
2026, week 20
