'Allei, trogkeliers, sjeet èns get op!' Het is ein maneer van zègke die in de jaore zestig is oetgesjtorve mèt de lètste aoj miense die zoeë kaldje. Of in mien geheuge inèns ein verborge laaj van het sjlaot waas gevlaoge, weit ich neet. Mer iërgister veel de zin mich zoeë mer oet het niks in wie ich in eine winkel aan de kassa sjtóng. Het sjaot neet op mèt eine man dae cóntant wool betale. Lichtelik haaj hae alle muntsjtökskes die hae de aafgeloupe vieftiën jaor haaj gevónje in eine kruutjespot bewaardj. Oetgeraekendj op de daag det ich achter hem sjtóng väör aaf te raekene, sjerdje hae oet det blik € 11,76 aan kleingeldj bie-ein. Hae haaj dieke vingers en aan het sjerre kwoom gein inj.
De cassière inspecteerdje óngertösse de kwaliteit van de lak op häör naegel. Oet de rie achter mich klónk iërst komies commentaar det flot verangerdje in ergernis. De man huerdje het neet of trok d'r zich niks van aan. Ich hoofdje mer twië deil aaf te raekene, ein kwestie van nog gein half minuut as ich aan de bäört waas gewaest. Mer det waas ich neet. Dus sjtóng is zeker al vief minute te haoje terwiel ich inèns hel mós pisse. Asof miene prostaat zien kans greep väör mich in te wrieve det hae zich neet mèt de pille van de dokter klein leet kriege. Ein toen gebäördje het. De zin floepdje op oet mien geheuge. Ze kwoom als ein gesjink oet de hemel, want ze leet mich de hoeëge noeëd väör aeve vergaete. 'Allei, trogeliers, sjeet èns get op!'
Ich huerdje de roukerssjtum van de opa d'rbie. Neet miene opa, mer van ein vriendje woeë ich waas gaon sjpele. Det waerdje dus aerpele rape. Ich waas ein jaor of zeve. Väöl zin väör opa te helpe haje we neet. En daoväör pakdje dae mèt eine reek in de handj grauwelendj taege ós oet. Dit sjtökske is noe intrintj klaor, ich höb neet getrogkeldj. Ederein wètj óngertösse natuurlik waat 'trogkele' beteikentj. Inderdaad, hetzelfdje as 'zuijere'. Ao jao, ich kwoom mèt ein drueg bóks thoes.
2025, waek 38
