'Mer auch sjoeër kriége is van lang geleje.' Die opmerking sjtóng ein poeës geleje op facebook bie miene kolumn dae äöver anger aoj wäörd en oetdrökkinge ging. Ein sjoeër is ein aod waord väör ein flinke bies raegel. En ein bies, zègk ich d'r väör de zekerheid bie, is ein buuj, waat lichtelik ein vertaling is van het Nederlandjse bui. Het waas vreuger en noe gein plezeer väör in ein sjoer terecht te kómme want doorein zoot d'r nötte windj, dónder en bliksem bie. De oetdrökking sjoeër kriege sjleit op ein anger sjlechte ervaring, flink sjlaeg kriege. En dao is ein volgendje oetdrökking oet óntsjtange, ze gesjoerdj kriege. Oos dialecte höbbe dao väöl wäörd en oetdrökkinge väör die óngeviër hezelfdje beteikene.
Doorein zeen het manskaerels die häör versjtand in de vuust höbbe zitte en zich flink zjwaarze. Waem aan het kortste inj trèktj, haet ze het helst gezwjaarsdj gekrege. Vreuger - en noe nog - haje väöl aojers losse hendjes. En flink pak rammel väör kinjer waas in 'de goje aoje tied' ein nomaal opvoedingsmiddel väör de wichter in het getuug te haoje. Die krege ze dan duchtig gerete en det waas in väöl hoeshaojes neet óngebroekelik. Dao waerdje de jeugd neet sjlechter van, waas de algemein opvatting. De Biebel zaet het zelf: 'Wie zijn kind liefheeft, spaart de roede niet.' (Spreuken 13: 24). Gelökkig haaj mien vader niks op mèt het Aod testament. Mèt het Noew troewes ouch neet.
Trök nao gifsjieters en vechtersbaze. Die krege ze dök los eweg op die pens, of ze gove det emes. Flink op die uig, kós ouch. Duchtig prugel, kumtj van äöver de grens. En det is hetzelfdje as flink gäöt kriege of ze flink gegaote kriege, doorgelaote waere, of aafgetuugdj waere en neet zoeë zunig dus. Det is nog net neet zoeë erg as ein oetdrökking die verwiestj nao het biebelverhaol det we allewiel 'the passion' mótte neume. Ich bedoel sjlaeg kriege wie eine laere Christus. As se zón sjlaeg kries mós se dich as verlezer waal erg rot veule. Mer het waord 'laer' snap ich aeve good neet.
2025, waek 23
