ColumnsFrits Criens

Column Modertaal: SJPROOKJE door Frits Criens

Midden Limburg

Mondkapje droog al achttiën jaor ein masker väör móndj en naas. Het wis neet baeter. Vandaag ging het ein sjtök wanjele in het Luedaal. 'Doot dien kepke neet aaf,' zag zien bezörgdje mam. 'Dan kan dich niks gebäöre.' Het waas sjoeën waer. Bie de Baedelier zoog het eine man op ein paerd. 'Doot det gek dink toch van dien gezicht,' zag de ruiter. 'Nae,' zag Mondkapje, 'zoeë kan mich niks gebäöre.' De ruiter lachdje hem oet: 'Erm wicht. Waat zooj dich kinne gebäöre?' 'Virusse,' zag Mondkapje. 'Die betrèkke dich óngezeen, ze kómme door móndj en naas nao binne. En dan geis se mesjien doeëd.' De man mós nog helder lache. 'Huers se det, Troje?' zag hae taege zien paerd. 'Allemaol waanzin, maedje. Dien moder wiltj neet det se plezeer meuks.'

 

'Waem zeetj gae?' vroog Mondkapje. 'Ich bèn prins Ingel,' zag de ruiter. 'Ich liër ederein danse nao mien piepe. Zónger móndjkepkes.' 'Danse!' reep Mondkapje. 'Dao druim ich van. De ligkendje tango, as ich dao aan dink!' Prins Ingel kwoom van zien paerd. 'Doot det kepke mer aaf, dan beginne we drek mèt de ierste les.' Mondkapje twiefeldje. Loestere nao mam, of nao prins Ingel? Dae zat óngertösse eine tango van Melando aan. Olé Guapa. Hae keek Mondkapje deep in de ouge en mook ein paar seerlike danspasse. Mondkapje kreeg het heit ónger zien masker en goeëdje de fóddel aan de kantj. Prins Ingel mook ein seerlike buging en dao zjwierdje ze al äöver de bóspaad.

 

Mondkapje genaot mèt de ouge toe. In het veur van de tango kwome ze tösse de sjtruuk terecht. Dao ging het wiejer, mèt het ligkendj gedeilte van de tango. Mondkapje ging oet zien daak. Geweljig, de tango mèt prins Ingel. Wie ze oetgedanstj wore, trok Ingel weer flot wiejer väör anger maedjes danse te liere. Nege maondj later loog Mondkapje met ein prinsesje in het kraombèd. Het en zien mam vónje het ein wónjer. 'Gelökkig höbs se dien móndjkepke altied väörghaoje,' zag zien moder. 'Angers woors se mich mesjien mèt corona thoesgekómme.' Ze zoog neet det Mondkapje achter zien masker ein roeëj kläör kreeg.

 

2020, waek 41

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.