'Waat waas de aafsjpraok?' vroog de moder. Ze goof zelf antjwaord: 'Twië ieskes per daag. Gae höbtj d'r al twië gehadj.' 'Det is neet ierlik,' zag häör dochter van ein jaor of vief. 'Ich höb zin in ein ieske.' Zien zösterke waas ein paar jaor aojer. 'Alle kinjer höbbe ieskes. Allein wae neet.' Het wees mèt eine zjwej äöver het sjtrandj. 'Twië ieskes per daag,' heel de moder vol. 'Angers zeen de centjes väör de bótteramme op.' Het jóngste waas neet ónger de indrök. 'We hove gein bótterhamme. We wille ein ieske.' De vrouw zuchdje. 'Mamma haet gein centjes mier.' Det haaj ze baeter neet kinne zégke.
'Mamma haet waal centjes,' reep het aodste. 'Allemaol breefkes.
Det höb ich gezeen. Mèt boeëdsjappe doon.'
'We wille ein ieske,' brach het kleinste de discussie trök woeë ze waas begós. Pap zat ziene smartphone oet en ging half rechtop zitte. 'Gaef die wichter toch ein ieske. Het is d'r heit zat väör.' De vrouw reageerdje asof ze waerdje äövervalle door ein batterie eikeprocesierupse. 'Val mich mer aaf woeë de wichter bie zeen. Waat bès doe väör eine vader.' Het jóngste wicht ging leef taege zien vader aanzitte. 'Gaon we döks van ein paar ieskes failliet?' vroog dae fien eweg. 'Doe drinks vanaovendj op het terras toch ouch net zoeëväöl wien as se wils. Of is dae väör niks?' Zien vrouw trok ein nöt gezicht. 'Die paar glazer wien. Zeen mich die neet gegundj?'
De man zoot inèns gans rechtop. 'Woeë geit dit in godsnaam äöver? Die wichter vraoge väör ein ieske. Det is alles.' 'Nae,' zag zuuj. 'Det is neet alles. Twië ieskes per daag, det is alles. Det höbbe we aafgesjpraoke.' Het aodste maedje veel zien vader bie. 'Nae, mam. Det höbbe wae neet aafgesjproke. Det höbtj gae gezagdj en dan is het geine aafsjpraok.' De vader glunderdje en haoldje ein breefke van tiën oet zien portefeuil. 'Hie, Sanneke,' zag hae taege zien aodste dochter. 'Mèt zón sjlum antjwaord höbs ze väör uch allebei ein ieske verdeendj. Gaef het wisselgeldj mer aan mam.' Het jóngste knikdje. 'Väör wien op het terras.'
2019, waek 31
