Ellie en ich sjtónge op de brögk äöver de reling nao ónger te kieke. Het water sjtruimdje hel. Het waas bekans zjwart. Óm de peilers in het midde van de brögk zote ein paar aendje zich nao. Het leek op ein sjpelke tikkertje. Het waas vreug in het väörjaor, dus het zal waal ein 'poging tot versiere' zeen gewaest. Ich waas blie det ich gein aendj waas en in ieskaod water achter Ellie aan mós zitte. Ein sjtökske wiejer op waas oos hotel. Dao ginge we haer. Dan waas natuurlik waal mét mich te kalle. Ellie lag mich ein handj in de nek en begós mich zaocht te sjtrieke. Haaj het mien gedachte geraoje? Eine miens kwoom naeve Ellie sjtaon, keek nao ónger in het water en zag: 'Dao zooj ich noe neet in wille ligke. Gae waal, mevrouw?'
Het waas ein akelige vraog, zeker ómdet de man ein gezicht haaj det neet zooj missjtaon in 'Opsporing Verzocht.' Hae goof Ellie gein kans väör te antjwaorde. 'Ich höb d'rin gelaege. Óm deze tied van het jaor. En ouch van de daag. Kintj gae zjwumme, mevrouw? Ich waal. Good zelfs. En toch móste ze mich d'roet haole. Zoeë kaod is det water en zoeë hel sjtruimtj het. Probeer het mer èns.' Hae mook ein bewaeging asof hae Ellie wool vastpakke óm hem... Det zal waal neet de bedoeling zeen geweest. Toch goof ich de kaerel gein kans väör te laote zeen waat dan waal zien bedoeling waas. Ich greep ziene erm, duudje hem van Ellie weg en zag: 'Wae gaon wiejer.'
Of Ellie gruets op mich waas, weit ich neet, mer het zag: 'Det waas ein kordate redding, meneer Criens.' Ich knikdje en zag väörzichtig: 'In films kriege redders altied ein sjoeën beloeëning.' Ellie keek mich ónnuezel aan. 'Jaomer, dit is gein film. Mer waat zoojs se angers gehadj wille höbbe?' Ich deej asof ich dao äöver mós naodinke en zag: 'We zoje väör de aardigheid väör aendj kinne gaon sjpele.' Ellie trok ein vies gezicht en reep: 'Doe dinks toch neet det ich mèt dich det kaod water ingaon.'
2019, waek 22
