Ich höb drie jaor in Naer gewèrktj. As óngerwiezer aan de jóngessjoël, bekans vieftig jaor trök. Pas geleje kwoom ich eine van mien aod-liërlinge taege op facebook. Normaal neum ich gein echte name in mien columns, mer noe moog det. Dae jóng is namelik eine bekindje artiest gewaore. Die haoje van publiciteit. In de jaore tachtig waas hae zelfs eine bekindje Nederlenjer. Ich höb het äöver Herman Smeets. Dae wón in 1984 ein groeëte talenteshow op de tv: Avro's Nieuwe Oogst. As imitator kreeg Herman toen op de Firato in Amsterdam de ganse Rai plat mèt zien imitaties van Gerrie Kneteman, de Zangeres Zonder Naam, Chriet Titualaer, Sjef van Oekel en Louis Armstrong. Daonao waas hae mèt groeëte regelmaot op tv en in theaters te zeen.
Herman Smeets kós mèt zien sjtum en ziene mimiek ederein naodoon. Daobie haaj hae ein geveul väör humor det väöl miense aansjprook. Dao waas hae as kindj al mèt gezaegeldj. In de klas kós hae van die drueg opmerkinge make. Hae zat d'r ein gezicht bie op asof hae neet tot tiën kós tèlle. Zien lank, sjlungelig figuur pasdje dao precies bie. In de zèsdje klas mós de sjoeël väör hem ein extra groeët setje aangesjaffe, want hae waas te lank väör de normaal sjoeëlbanke. Natuurlik kwoom hae daomèt in de gezèt. Det huertj bie eine aankómmendje artiest. Ein väörval in de klas sjteit mich nao bekans vieftig jaor nog sjerp väör de geist.
Vanaaf det mien vader op mien achttiëndje is gesjtorve, höb ich hiel lang allein zjwarte zök gedrage. Ich zoot dae mörge op miene lessenier ein verhaol väör te laeze. Det deej ich edere daag. Wie ich mich get verzat, sloog ich mien linkerbein äöver het rechter. Daobie sjaof de bóksepiep ómhoeëg. Det haaj de klas neet gezeen, de kinjer zote doeëdsjtil te loestere nao de avonture van de Kleine Kapitein. De humorist in Herman Smeets waas óngertösse in ziene kop mèt get angers bezig. Baove mien sjtum oet klónk inèns die van hem. Hae wees nao mien zjwarte zök en reep: 'Kiek dao, de meister is net ein begien!'
2019, waek 27
