Ellie en ich lepe op oos gemaak door de sjtad. Op de Mertj begós het carrilon te sjpele en de figure in de taore moke häör rundjes. Altied weer sjoeën väör te zeen. Det mót ein reisburo in China ouch gedachtj höbbe. Midde op de Mertj sjtóng eine groep Chineze. De boeëdsjappetasse óm häör haer van winkels oet het Outlet wore neet de tèlle. Ze volgdje het sjpeel óm de taore. Mer väöral wore ze det aan het fotografere. Eine man haaj zich ein sjtök trök op de gróndj gelagdj väör zien vrouw en de figure róndj de taore in ein beeldj te vange. Hae waas al get aojer en sjtief van knäök. Toch bleef hae op ziene rögk aan het sjörge väör de juuste haojing.
Of de foto’s gelöktj zeen weit ich neet. Wie de vrouw ein handj nao hem oetsjtook väör hem te helpe mèt opsjtaon, zoog ze waat d’r waas gebäordj. Hae haaj zich op eine frietzak gevreigeldj woeë nog ein kwak majonais in haaj gezaete. De klódder zoot noe gans in het haemdj van de fotograaf. Ich haaj de man vol bewónjering gevolgdj wie dae zich aan het oetsjtrieke waas väör die foto. Noe bleek det hae zich neet allein figuurlik mer ouch letterlik haaj oetgesjtreke. De vrouw haoldje papere zakdeukskes oet häör handjtas, mer wreef de rómmel allein mer wiejer äöver het haemdj. Ze zag get taege de man, mer det waas Chinees väör mich. Gauw genóg zoog ik waat de bedoeling waas.
De vrouw leep nao ein van de boeëdsjappetasse, haoldje d’r ein noew haemdj oet en leep trök nao häöre man. Dae sjtóng d’r ein minuut later weer gelektj op. Nemes van de groep haaj het gezeen, op eine man nao. Dae haaj foto’s van het sjpeel gemaaktj, mesjien waal eine video. Hae zjwejdje mèt ziene camera nao de man en de vrouw en reep get. Het waas Chinees väör mich. De vrouw reep get trök, waat ouch Chinees väör mich waas. Mer in häör toeën klónk väör mich gein letter Chinees: Riskeer dich neet menke väör det emes te laote kieke!
2018, waek 28
