Ellie en ich bekeke in ein sjoonzaak de collectie väör mansluuj. Noew sjoon zeen väör mich eine ramp: het laer is sjtief, de zaole zeen neet soepel en duje op plaatse die de veut neet gewindj zeen. Mien tiëne protestere en blieve wriemele en bewaege väör zich los te worstele van de vraemdje tiranne. De kuitsjpiere helpe mét aan det verzèt en verkrampe, zoeëdet ich mien aoj sjtappers van erme ozel weer mót aantrèkke. Daoväör doertj het lang väör ich mien aafgelaefdje sjoon väörgood dörf aaf te danke. 50 jaor geleje wie Ellie en ich in augustus ginge trouwe, kóch ich maondje van te väöre al mien trouwsjoon.
Aldaag trok ich ze aeve aan väör te winne. Ich dwóng michzelf väör ze neet oet te goeëje. Nao ein paar waeke begós ich ze väörzichtig in te loupe. De zök die bie het pak en de sjoon pese, trok ich d'r bie aan, angers kóste die op de hoeëge daag väör óngemaak zorge. Wie ich het lestigste probleem van het trouwe zoeë haaj opgelostj, zote d'r gate in de zök en mós ich mich mét neet ingeloupe zök aan het altaor melje. Dao dach ich aan wie ich het iërste paar in de sjoonzaak pees. Mien veut kwome in opsjtandj. Ich vertèldje Ellie waat d'r aan makeerdje. De miens dae naeve mich zoot te passe, loesterdje vol aandacht mèt. 'Neet koupe, dao kries se äëgerste-uig van. Dan duis se het echt in de bóks.'
Hae vertèldje in ein paar minute het drama van zien aegerste-uig en deej in dae tied minstens 15 kiër van de pien in de bóks. Al gebroekdje hae dao het plastiese Z-waord väör. Zónger noew sjoon ging ich heivers. Achter in de haof hakdje ein aegerst in op ein net mèt apeneutjes. Häöre sjpitse sjnavel zoog d'r geviërlik oet. De sjale van de neutjes vlaoge alle kantje oet. Het verhaol van de miens in de winkel kwoom trök en ich veuldje de pien aan mien veut die hae geveuldj mós höbbe. Rap mook ich mich nao de wc, väördet mien blaos hetzelfdje zooj reagere as die van hem.
2023, waek 3
