Ich bèn douf aan mien rechteroer. Fiëste, concerte, toniël, musicals, op ein terras zitte aan ein drökke waeg, kalle en loestere in gezelsjappe, miense die mèt de handj väör de móndj kalle, zaocht of ónduidelik of väöl te flot spraeke, of de kop van dich aafdrejje as ze get zègke, det zeen allemaol vervaelendje situaties woeë emes mèt huerprobleme mèt te make kriegtj. Daoväör kins se neet zunig genóg zeen op dien gehuer. Want wie sjlechter dien gehuer is, wie kleiner diene waereldj waertj. Sjlecht huere is ein flinke handicap.
Gelökkig kumtj mien doufheid neet door veurwerk. Det is waal ein groeëte oorzaak van het probleem woeë sjteeds miër miense mèt zitte. Eder jaor kómme d'r weer noew sjlachtoffers van ekstreem knalveurwerk bie. Ouch miense die boete nao de 'fiëstvreugde' sjtónge te kieke. De 'gelöksvogels' höbbe mer 'lichte' besjadiging aan häör gehuer. De echte 'pechvogels' waere blievendj douf. Doeëdzunj, want het waas väör allebei neet nuedig gewaes. Pas as het te laat is, besefs se waat se mós misse. Mèt emes dae zichtbaar gehandicaptj is, waertj raekeing gehaoje. Mer van huerprobleme is aan de boetekantj niks te zeen. Daoväör is het väör miense lestig dao raekening mèt te haoje. Ouch as ze weite van het probleem, vergaete ze het gewuen. Begriepelik mer vervaelendj.
De Biebel vertèltj det apostel Piëtrus in de Haof van Olieve eine soldaot mèt ein zjwaard het rechteroer aafhoudje. Jezus zat het oer d'r weer aan. Het liektj mich Biebelse Mindf*ck väör ós allemaol mèt zón wónjer ein oer aan te nejje. Ein bezunjer oetdrökking, troewes. Emes ein oer aannejje haet twië beteikenisse: emes mèt sjlauwe kal get wiesmake of bezeike. Mer ouch: emes väör sjöt zitte. Det lètste kumtj oet het óngerwies van hiel vreuger. Wichter die neet mètkóste en 'dóm' foute moke, of 'dóm' antjwaorde gove, krege aezelsoere opgezatte. Ze sjtónge dus väör sjöt as domoren. Alle domoren die häör gehuer höbbe verpestj mèt veurwerk, terwiel ze van het gevaor wiste, höbbe zichzelf aezelsoere opgezatte. Waal sjnue det de meiste d'r laeveslang mèt mótte róndjloupe. Laot det veurwerkverbod mer flot kómme. Allein al daoväör.
2026, waek 2
