Ellie en ich zote gister te kalle äöver 24 augustus 1973. Väör de meiste miense eine gewuene daag. Väör ós de daag det wae väör de kèrk zeen getrouwdj. Väör de wet wore we al ierder getrouwdj in Remunj want Ellie woeëndje in Liëwe. Op eine maondjig, dan waas het väör niks. Zoeë waas det in dae tied: trouwe väör de wet mós, mer het huwelik waas pas echt as eine geistelik het sacrament haaj toegedeendj. Hay Klaassen de buteredner oet Naer haaj dao ziene eige kiek op. Väör de wet trouwe is hetzelfdje as ein noew bel op diene fiets kriege. Mer pas as se väör de kèrk bès getrouwdj, moogs se belle. Afeng.
De trouwmès waas in de kèrk van Nunhem bie pesjtoeër Neuss. Dae heel vreuger de gymzaal aop woeë jeugd oet de ganse buurt ging sjporte. Ich kós good mèt Neuss opsjete. Het waas eine hiel aardige miens dae mich versjillendje kiere haet gepolstj of ich geistelik wool waere. Het ging mich te wied väör hem det plezeer te doon, want ich wis al waat ich dan mós laote sjete. Mer det hae Ellie en mich zooj trouwe, waas prima. Pesjtoeër waas aardig versjlete wie we väör zien altaor sjtónge. Gelökkig mook hae allein in het begin van de mès ein fout wie hae neet oos name neumdje, mer die van het broedspaar det väör ós waas getrouwdj. Verder ging alles good.
Ellie waas ein prachtige broed. Zien trouwkleid waas sjpeels van model en zoot hem wie gegaote. Daobie droog het eine flotte hood dae hem extra sjwung goof en hem nog jeugdiger mook. Ich vraog noe nog waal oeët: 'Zit dich dae hood nog èns op.' De broelof waas bie Servaos. We haje ein orkestje oet Belsj, het beer waas oet Naer en de miense kwome van alle kantje. Het waas drök en gezellig. Ich höb van mien laeve noeët zoeëväöl gedanstj as toen. De tied vlaog óm en het waas half drie väör we in bèd loge. Gelökkig hoofdje we die bel neet oet te probere. We wiste al det ze het deej.
2020, waek 35
