Het is lètst augustus en al waeke achterein drueg. Heite zón en helle windj doon de natuur gein good. De lócht zitj vol sjtaof en opwejjendj zandj, dor blajer ritsele aan de buim of ligke al d'rónger. Het fruit is waeke iërder riep as normaal. In de bos ligktj brandj op de loer. Baeke sjtaon half drueg, peul, ziepe en moerasse gans. De meiste boere kinne häör gewasse sjpuite mèt gróndjwater. Det zorgtj väör eine tamelik normale ougst. Veljer die neet besjproejdj waere, ligke d'r sjaemel bie en levere amper get op. Al mèt al zulle wae burgers dao neet väöl van merke. Hoeëgoet det de laevesmiddele deurder waere. Mer det wore ze toch waal gewaore, zónger druege zomer.
Hiel lang geleje wore d'r ouch heite en drueg zomers. Ouch toen wore boere aafhankelik van het waer. Kunstmèst waas d'r nog neet, dus de opbringste per hectaar wore al väöl minder as noe. En beraegele mèt installaties die daag en nacht gróndjwater oppómpe waas hoeëgoet de druim van eine boer mèt väöl fantasie. Väöral zandjboere waerdje door drueg zomers hel getroffe, want eine kleine ougst beteikendje ouch ein klein inkómme. Ermood dus, dae häör de kop kós koste, zeker as d'r ein paar sjlechte zomers achterein kwome. Hulp van de Sjtaot besjtóng neet. Banke die taege hoeëg rentes mèt valse beloftes truest belaofdje en de pechvogels óngertösse eine sjtrop óm de nek lagte, besjtónge gelökkig ouch neet. Baeje kós helpe, belaofdje pesjtoeër.
Bedrieve langs Maas en baeke haje doorein zjwaore gróndj. Dae is vruchtbaarder en hèltj langer water vast. Boere op die bedrieve kóste eine druege zomer nog waal doorkómme. Det wore dan ouch doorein boere die zich in de beurs good kóste helpe. Mien sjoeënvader haaj zón bedrief mèt zjwaore gróndj. Dus wie ich Ellie trof dach ich det ich het in alle opzichte haaj getroffe. Waat Ellie betreftj waas det ouch, mèt het bedrief loog det angers. Det mook väör ós niks oet. We woeëne al twiëenviefitig jaor op de zandjgróndj in Haelen woeë gein boere mier zeen. En toch höbbe wae alles bie-ein neet sjlecht geboerdj.
2025, waek 36
