ColumnsFrits Criens

Column Modertaal: 'CORONAÏEF' door Frits Criens

Leudal

Het is vriedigmiddig as ich dit sjrief. Op miene i-phone kómme väör en nao berichte binne. Ein van die berichte deej mich trökdinke aan woonsdig. Ich waas bie de bekker. Inèns begós het in mien naas te kriebele. Ich mós neeste. Gelökkig waas ich d'r op tied bie väör eine zuvere zakdook oet de tes te haole. Gans volges de regels neesdje ich van de miense aaf, mèt de zakdook väör de naas en de kop nao ónger. Zoeë doon ich al mien laeve lang. Dees reis waas het angers. Zónger det ich d'r äöver naodach, zag ich taege de vrouw achter de toeënbank: 'Bèn mer neet bang. Ich höb geine corona.' Ze lachdje d'r èns mèt, net as de twië anger klantje in de winkel. Toch veuldje ich mich ónnuezel, ein bietje naïef.

 

Corona. Het waord haet de lètste waeke het waord "seks" verdrónge van de ierste plaats op de liest van meist gebroekdje wäörd.

Det haet ein kort óngerzeuk ónger michzelf oetgeweze.

In alle wauwelprogramma's (talkshows heite die in good Nederlands) op de tv geit het mer äöver ein dink: het coronavirus. Eder jaor sjterve miense mèt ein sjlechte gezóndjheid aan ein of anger griep. Dao huere we amper äöver. Mer corona is de knuffel van de pers. In het noets op de radio en tv geit het allein mer äöver corona. Ouch in de gezètte is het corona väör en corona nao. Ich vermoed det dees griep de journaliste good oetkumtj, ómdet ze niks angers te melje höbbe.

 

Die gedachte waas de aanleiding väör dit sjtökske. Want het bericht op miene i-phone meldje: Iërste corona-doeëje in Nederlandj. Ich dörf het neet te zègke mer ich dach: 'Dae journalist haaj het leefst gesjreve, "Eindelilk tèlle we mèt." Ich kan het natuurlik neet make väör det hie plómpverlaore in dit sjtökske te zitte. Mer ich dach ouch: 'As dokters zègke det d'r gein raeje is väör paniek, woëväör blaoze de media het coronaprobleem dan zoeë op? Het antjwaord weit ich neet. Waal noom ich mich heilig väör óm het in mien columns absoluut noeët te höbbe äöver corona.

 

2020, waek 11

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.