Ich gebroek zelje miene betaalpas. Det meuktj de kans väör de code te vergaete ekstra groeët. Wie ich wool tanke waas het zoeë wied. De bezienpómp meldje mich tot drie kier toe det ich ein fout nummer haaj ingetoetstj. Het pasje waas geblokkeerdj. Wie ich de bank belde, kreeg ich ein dame d'raan mèt ein jóng sjtum. Ich lag het probleem oet. Ze zooj miene pas activere, waas häör väörsjtèl. Dan kós ich hem weer gebroeke. Ich lag opnoew oet det ich mien code neet wis. Det het dus weer fout zooj gaon. De dame rooj mich aan väör ierst good nao te dinke väör ich het ging probere.
As het dan weer mis ging, mós ich mich persuenlik bie de bank melje.
Ich dach eine daag of drie zoeë hel nao det ich koppien kreeg. Oeët haaj ich het nummer örges opgesjreve, väör as ich het zooj vergaete. Det wis ich nog, mer ich wis neet mier woeë ich die aanteikening haaj opgeborge. Det waas hiel erg. Ich begós aan michzelf te twiefele en waas niks geröstj äöver mien toekomst. Het ging waal hel achteroet mèt mien geheuge. Zooj det het begin zeen van...? Toch sjreef ich drie codes op die het mesjien kóste zeen. Mèt min haop en nog minder vertroewe ging ich mèt Ellie nao eine bónbónwinkel in Remunj. Alle codes die ich haaj genoteerdj wore fout: ich haaj neet hel genóg naogedaochtj,
väör sjtraof waas miene pas weer geblokkeerdj.
Ich sjaamdje mich kepot väör michzelf, det ich op de bank mós bekinne det ich neet good genóg haaj naogedachtj. Ellie ging väör de zekerheid mèt. Want ja, emes dae vergaetechtig is, dao kins se neet langer gans van op aan. Väör hetzelfde geld wis ich neet mier wie ich thoes mós kómme en leep ich wie eine zjwerfhóndj achter ein vraemdje vrouw aan. Dao zeen mansluuj die det al doon as se neet vergaetechtig zeen. Efeng, ein vruntjelike mevrouw holp mich. Ze waas neet kwaod op mich. Gelökkig wis ich nog alles waat ze mich vroog. Allein waas ich wie ich thoeskwoom mien haose vergaete.
2020, waek 3
