ColumnsFrits Criens

Column Modertaal: DU door Frits Criens

Midden Limburg

Het waas hartsjtikke gezellig en fiëstelik drök op de broeloft. Ederein waas oetgelaote en haaj good zin. Zelfs miense mèt erkindje klachte aan het hert, de rögk of anger deile van het lief wore vergaete det ze väörzichtig aan móste doon. De dansvloer waas de ganse aovendj de drökst bezatte plek van de zaal. Dao ging het aaf en toe flink te kiër. Ederein ging geklèdj op zien paosbèst. Mer haleverwaege de aovendj haje eine houp manskaerels colbert of vest al oetgedaon en ginge d'r taege-aan wie in häör bèste jaore. Het publiek waas van alle laeftieje. Broed en broedegom wore viërtig jaor getrouwdj en det zooj gevierdj waere!

De diskjockey drejdje väöral hits oet de väörige iëuw woeë bekans ederein de tekste van kós mètzinge.

 

Wie DU van Peter Maffay oet de geluidsbokse klónk waas de dansvloer te klein. Het nummer is oet 1970, wie ich Ellie höb liëre kinne, dus wae sjtónge ouch tösse de dansers. Peter Maffay waas echt verleefdj, zoeë klónk zien gezang teminste . 'Du bist das Mädchen, das zu mir gehört. Ich lebe nur noch für dich.' Ich mós bie die wäörd aan ein nicht van mich dinke. 'Dae haet het erg', zooj die gezagdj kinne höbbe. 'Det geit waal äöver.' Noe vieftig jaor later, weite we det Maffay ouch echt dök ein anger haet gehadj. Daoväör dach ich: 'Huichelier. Allemaol läöges waas doe dao zings. Doe hèls det maedje väör gek. Doe wissels net zoeë gemaekelik van vrouw as eine haan van zien hoonder.'

 

Aeve good is DU ein prachtig nummer väör op te danse. Zeker as se, wie ich, neet kins danse. Sjufele is dan ein plezerige oplossing die ich nog neet waas verliërd. Broed en broedegom kóste waal danse en druimdje weg op de romantiese melodie asof ze zich väör het iërst taegekwome. Ze keke zich deep in de ouge. Wie Peter Maffay zóng: 'Ich hab' dich lieb, ja, ich hab' dich lieb. Und ich will dich immer liebhaben,' begóste ze aan ein sjpontaan improvisatie. Ze kösdje zich det de sjtökke d'r vanaaf vlaoge. Zoeë te zeen gein ónbekindj ritueel.

 

2023, waek 11
 

 

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.