Gouw medalie. Vieftig jaor lang, veer kiër per jaor ein good verzorgdj en interessant blaad oetgaeve. Mèt vriewilligers. Dan höbs se goud verdeendj. Die iër geit nao de Stichting Studiegroep Leudal en omstreken, baeter bekindj as de Sjtudiegroep. Häör liefblaad hètj Rondom het Leudal. Wie kan het ouch angers, want het natuurgbied woeë zelfs ein ganse gemaendje van zèstiën dörpe nao geneumdj is, waas in 1971 de aanleiding väör de oprichting van de Sjtichting. Indertied haaj de gemaendje Haelen planne väör in het Luedaal ein groeët, toeristies pretpark aan te ligke. Weinig inwoeëners van de gemaendje begrepe toen waat väör ein bezunjer sjtökske natuur het Luedaal is.
Noewkómmers van boete de gemaendje Haelen, väöral de Hollenjers, zoge det gelökkig waal. Same met bezörgdje miense oet de ómgaeving richdje ze de Sjtichting op väör dae draak van ein plan alle zeve zien köp aaf te houwe. Mèt sukses. Het doel waas gehaoldj, mer de Sjtichting ging wiejer, want besjerming en behaod van het Luedaal zeen noeët gedaon. Ein van de draegers ónger de Sjtudiegroep waerdje het tiedsjrift. Det bringtj nog altied interessante óngerwerpe äöver flora, fauna, milieu, landsjap, gesjiedenis. Mèt verhaole, teikeninge, archiefsjtökke, sjtatistieke en foto's van toen en noe. Zoeë doondje kós het tiedsjrift tegeliek ein half iëw aod waere en jónk blieve. Pas geleje leet jubilaris Rondom het Leudal, het twiëhongerdste nummer bie de abonnees in de bös valle. Ein gouw presatie.
In vieftig jaor is väöl verangerdj, mer neet het hoeëg nivo van het blaad. Laot det mer äöver aan al die deskundige vriewilligers mèt häör biedrages. Det zeen miense die vanoet häör beroep kinnis van zake höbbe äöver de thema's woeë ze äöver sjrieve. Mer ouch amateurs die zich höbbe ingegrave in Luedaal-zake levere iërsteklas werk aaf. De redactie is de sjtille e-motor achter het blaad. De lede höbbe zich gevónje in de geist van ein aod gezègdje: allein kinne we niks, same kinne we alles. Het is te haope väör het Luedaal en väör de abonnees van Rondom het Leudal det dae geist de ganse Sjtudiegroep nog lang blieftj inspirere. Op dus nao het diamant!
2026, waek 5
