Bekans edere Limburger is waal èns in het Aopelóchttheater van Tegele nao de Passiesjpele gewaest. Theater de Doolhof en de Passiesjpele huere bie de Limburgse cultuur, wie de witte hoezer van Thoeër. Troewes, neet allein die hoezer bezorge het wit sjtedje eine groeëte naam op cultureel gebied. En ein paar jaor geleje pas, dus nog neet zoeë bekindj, kreeg Thoeër, net wie Tegele, ein prachtig Aopelóchttheater. Het ligktj romanties tösse Restaurant Hofferkeukens en de achterkantj van de Abdijkèrk.
Ellie en ich zeen d'r al ein paar kiër nao ein väörsjtèlling gewaest. Pas geleje nog, nao ein sjtök oet het programma van het Limburg Festival: ‘Der Freischütz’, eine opera. Opgegreudj mèt Jimi Henrikx, Doors en Iron Butterfly, zooj ich operamuziek neet drek mien iërste käös wille neume. Gans fout. Het kaoper-orkest waas geweljig, de zank ouch en van het samesjpel tösse zank en muziek waas ich ónger de indrök. Het thema van het verhaol sjprook mich troewes drek aan. Max, eine jaeger, verköptj zien zeel aan duvel Samiel väör mèt zien leefste te kinne trouwe. Zake doon mèt de duvel is geviërlik. Behalve in Aoke woeë ze gein cente miër haje väör de Dom aaf te boewe.
Satan, verklèdj as sjieke hiër, baoj eine zak geldj aan, as hae de zeel zooj kriege van de iërste dae de kèrk binneging bie het inzaegele. Det zooj Keizer Karel de Groeëte zeen. Mèt zón belangrieke zeel kós Satan zich in de hèl laote kieke. Mer de miense van Aoke haje hem door. Net väör Keizer Karel door de zjwaor, kaoper däör de Dom inleep, joog het kèrkbesjtuur eine wolf väör hem oet nao binne. Satan sjtóng achter de däör verborge, sjpróng nao väör, greep de zeel van de wolf en zoog toen pas det hae zich haaj laote kloeëte. Giftig sjmeet hae de däör mèt eine sjlaag achter zich toe. Zoeë hel, det hae zien handj te laat tröktrok en eine vinger versjpeeldje. Waas d'r in Thoeër ouch mer zónne dómme duvel gewaest. Mer jaeger Max haaj pech. Ich höb Samiel zien vingers drie kiër naogetèldj. Hae haaj ze nog alle nege.
2022, waek 36
