Ellie en ich wore twië waeke trök in Amersfoort. Dao is altied waal emes dae dan vreugtj: 'Waat mótj gae dao?' Väör die vraog väör te zeen, gaef ich vast het antjwaord. Op zunjgaovendj ginge we nao de musical 40 - 45 in Barneveld. Die plaats van hoonder en eier ligktj neet zoeë gek wied van Amersfoort, waat ein prachtige sjtad is. Daoväör pakdje we dao ein hotel want de ómgaeving is geweljig väör te fietse. Väör het geval het waer neet zooj mètwèrke haaj Ellie ein plan-B-programma bedachtj. Dao dredje het op oet, want de waersverwachtinge belaofdje te kaod waer väör te fietse. Acheraaf haje de waerprofiëte raegel gezeen dae neet kwoom en de zón vergaete te melje die zich volop leet zeen.
Op maondjig ginge we nao Haarzuilen. Pierre Cuypers oet Remunj haet dao van ein ruïne ein enorm middeliëws kesjtiël gemaaktj en det prachtig ingerichdj. Dinsdig en ouch woonsdig tot halverwaege de middig höbbe we Amersfoort verkindj. Op De Hof het groeëtse plein van de sjtad wool eine man bie het fontijn ein foto make van zien vrouw. Wie die keek! Het deej mich dinke aan miër as vieftig jaor geleje. Ellie en ich wore mèt ein gezelsjap ein waek nao Paries. We trokke väöl op mèt ein koppel oet het Zuje. Hae wool altied de lolligste zeen. Det ging waal èns vervaele. Zeker väör zien vrouw.
Hae wool ein foto van häör make väör ein fontijn. Ze ging d'r väör posere en trok ein gezicht wie ein gelökkige broed. Mer häöre man waas weer èns lollig en zag: 'Allei ... kiek èns ein bietje blie. Ich wil ein leef foto van dich, väör later op dien printje bie de begrafenis.' Ein foto van het gezicht det die vrouw toen trok, haaj zeker de iërste pries in edere groeëte wedsjtried gewónne. Wie ich in Amersfoort taege Ellie zag woeë ich aan dach, begós het te lache. Neet mèt die vrouw väör het fontijn, mer mèt die vrouw in Paries. Die pakdje zoeë hel oet taege häör lolbóks det wae hem twië daag neet miër höbbe gehuerdj.
2026, waek 16
