Dao zeen wäörd die se bekans in eder situatie kins gebroeke. Lekker is dao ein väörbeeldj van. Mer ouch het waord gezellig. Äöver det lètste waord geit miene iërste column van het noejaor. Ein lekker gezellig begin. De aanleiding väör dit óngerwerp is aevel get minder lekker of gezellig. Ein waek of zès geleje kwoom ich eine vrindj taege. Ich wis det ziene paetaome net waas gecremeedj. Dae miens waas al ein sjtök in de negetig. Ich condoleerdje miene vrundj en vroog: 'Wie waas de crematie?' Het antjwaord haaj ich neet verwachtj: 'Gezellig.' Ich waas effe sjtil. 'Gezellig, bie ein crematie?'
'Natuurlik,' zag miene vrundj. 'Ich höb d'r noe nog plezeer van. Nemes haet ein traon gelaote. Ederein wis det aome Sjaek zooj sjterve, hae waas aod, versjlete en haaj ein sjoeën laeve gehadj. En aevel, wie det nog ging, haet hae dökker as èns dudelik laote weite det het väör hem neet mier hoofdje. Dus we wore allemaol blie väör hem, det het waas aafgeloupe. We höbbe iërst ein sjoeën aafsjied gehadj in het crematorium, zeen langs de kist geloupe en daonao höbbe we in ein zaelke ein gezellige koffietaofel gehadj. En daonao eine nog gezelligere naoborrel. Dao is flink gelache door ederein. Det haaj aome Sjaek goodgedaon, as hae d'r nog bie waas gewaest.'
Aeve good, is d'r eine miens doeëd,' zag ich väörzichtig. 'Dan kins toch neet kalle van ein gezelige crematie.' Dao miene vrindj gamns angers äöver. 'Zeker, aome Sjaek is doeëd, mer dao keek hae eigelik nao oet. Dus hae haet gekrege waat hae wool. Mótte wae dan aan zien kist sjtaon te griene?' 'Griene,' antjwaordje ich, 'is nog get angers as gezellig fiëste bie emes ziene doeëd.' 'Doe zuus het te zjwart,' sjprook miene vrundj mich taege. 'Aome Sjaek zooj neet angers gewildj höbbe. As hae d'r bie waas gewaest, haaj hae de sjuunste moppe vertèldj. Det höbbe we noe allemaol same gedaon. Väör hem. En wie we nao hoes ginge, zóng de ganse bubs zien levelingsleed: Och waas ich mer bie moder thoesgebleve. In gedachte huerdje ich aome Sjaek mètzinge. Lekker gezellig.'
2023, waek 1
