Ellie en ich zote op het terras van 'Koffiehuis Brug 6' in Arendonk (B). Zón terras woeë se noeët miër zoojs wille opsjtaon. Achter ós loog ein aojerwets häöfke mèt ein knienskoeëj die deenst deej as hok väör veer 'zijdehoenders'. Prachtige kriele. Aaf en toe kwome ze het terras op. Soms klónk ein bel, bie de brögk. Dan ging de waeg toe en de brögk aop väör eine plezeerboeët door te laote. Het koffiehoes waas oet 1899. As se de elektriese fietse van de gaste wegdachs, waas d'r neet väöl verangerdj. Ellie en ich wore op ein plaats woeë het waord 'vrede' wortel haaj gesjaote, mèt ein prachtig äöverzicht äöver het sjoënste deil van het terras.
Ein koppel van róndj viefendertig zat zich aan ein täöfelke. De vrouw haaj ein wied kleid aan. Ze krege häör consumpties gebrachtj wie de kriele noesjierig op häör aaf kwome. Hiel röstig, mer de vrouw sjpróng op asof ein krokodil häör wool aanvalle. Ze waas mèt gein paerdj trök op häöre sjtool te kriege. Pas wie de ober de kriele oze kantj oet lokdje, ging ze weer zitte. Aan de taofel achter häör zoot eine man. Ellie en ich zoge wie hae zien keukske vergrumeldje en de sjtökskes ónger de sjtool van die sjoew vrouw goeëdje. Det haje de krielhoonder natuurlik ouch gezeen.
Ze sjtaove op de sjtool aaf. De vrouw vlaog ómhoeëg asof ze in allebei häör batse waas gesjtaoke door ein wesp. Häör rechterbein sjtoeëdje ónger taege het täöfelke, de vrouw verlaor het aevewicht en greep zich vast aan het taofelblaad. Häör glaas kiepdje óm, de wien vlaog äöver häör kleid. Häöre man redje zien glaas beer en greep mèt de anger handj het laeg glaas, väördet het van de taofel kós rolle. De krielkes wore aan de kantj gesjtaove, mer bleve in de buurt en hele de gräömele in de gate. De vrouw verdween mèt väöl gejaomer nao binne. Wie ze trökkwoom, sjtóng d'r ein noew glaas wien. De man van de gräömele waas aan het aafraekene en vertrok. De gräömele wore weg. De hoonder ouch. Nemes haaj helop gelache.
2023, waek 34
