Dao zeen gelöksvogels mèt de bezunjere achternaam Van Limburg. Dan is het nog èns ekstra bezunjer as se mèt dae achternaam neet in oos provincie woeëns, mer in Frieslandj. Det kumtj väör. Begin november väörig jaor kreeg ich ein bericht van ein mevrouw oet Heerenveen. We kindje ós neet, mer ze sjrieftj zich Van Limburg en haaj ein vraog äöver oos dialect. Ze sjpeeltj toniël en kreeg in het sjtök Dansen in het duister de rol van ein vrouw oet Remunj die in de aorlog waas geëvacueerdj nao Frieslandj. Dao zeen toen miër as 70.000 Limburgers van de oeëstkantj van de Maas in viëwagons mèt de trein weggeveurdj nao Drenthe, Groningen en Frieslandj. Mien sjoeënaojers ouch, mèt eine baby van ein jaor en zien breurke van twië. Neet alle evacués zeen laevendj trök gekómme.
Allein al op de katholieke kèrkhaof in Heerenveen ligke 18 Limburgse wichter tösse de drie maondj en ein jaor die begin 1945 in Frieslandj zeen gesjtorve. Dokter Bonnema, kinjerarts in het zekehoes van Heerenveen, haet die kinjer dao laote begrave. Op initiatief van de Stichting Rura oet Remunj is väör dees sjlachtoffers op 3 mei 2012 ein monument opgerichtj, op dae kèrkhaof. Dao sjtaon de name, de laeftieje en de woeënplaatse van de kinjer op. Remunj, Grathem, Vènlo, Neel, Echt, Zjwame, Gennep, Miëlick, Ruestere en Herte. Precies drie jaor later is d'r nog eine zuul geplaatstj mèt informatie äöver het wie en waat van dae gedinksjtein.
Op 4 mei 2024 waertj in Heerenveen het sjtök Dansen in het duister gesjpeeldj. Ich kreeg de vraog van mevrouw Van Limburg of ich häör wool helpe. Wie ich al sjreef, geit ze de rol van ein vrouw oet Remunj sjpele en ze wiltj häör taal good Limburgs laote klinke. Op häör verzeuk höb ich häör tekst in het dialect ingesjpraoke en daomèt is zuuj gaon oefene. Mèt hiël väöl iever en plezeer, want ze leustj óngertösse mien columns in Modertaal. Det geit häör prima aaf. Oet häör opmerkinge maak ich op det ze mien verhaole good begrieptj. Zooj het dan toch 'ein kwestie zeen van gedöldj tot...' Efeng.
2024, waek 14
