Wie ich het biëst ein waek geleje op de tv zoog, dach ich eine perik te zeen. Het NOS-journaal brach het noets as ein sjpannendj verhaol. Toch is eine raegenworm van 8 cm gein monster. Mer het verhaol achter het biëst mook d'r waal degelik ein monster van. En neet väör niks, bleek al gauw genóg. Waat ich te zeen kreeg, waas eine róndjworm, ein parasiet. Det biëst haaj róndjgekrónkeldj door de herses van ein vrouw in Australië. Ich kan d'r niks aan doon, mer ich mós drek dinke aan het waord 'hersekrónkels'. Det beteikentj waal get angers, mer letterlik klopdje het ein bietje. Nemes wis det het monster dao zoot, het haaj vrie sjpel. Natuurlik kreeg die vrouw probleme.
Ze klaagde äöver boekpien en diarree. Mer in häör derm waas niks te vinje. Ze haaj ouch last van eine druege hoost en ze zjwèdje sjnachts. Get later begós ze vergaetechtig te waere. Ouch veuldje ze zich depressief. En dan kums se al gauw bie eine neuroloog terecht. Die leet eine mri-scan make. Dao zoot get in de herses van de patiënt, mer waat precies waas neet dudelik. Het waas dus nuedig det de chirurg zelf via ein operatie in de herses zooj kieke. Ze dach det ze ein gezjwel zooj vinje of kanker. Det zooj de klachte verklaore. Meistal kloptj det,
dees reis neet. Ze vónj eine laevendje worm dae vrolik door het brein van die vrouw krónkeldje. Det waas nog noeët iërder vertoeëndj.
Wie kumtj ein vrouw van 64 in godsnaam aan eine róndjworm in häör herses? Ein parasiet die tot dan allein in pythons väörkwoom. Australiese geliërdje dinke det ze het antjwaord weite. Die vrouw plókdje dökker graas väör mèt te kaoke bie het aete. Lichtelik haet ze graas woeë sjlangesjtróntj aanzoot, neet good gewasse. Dao höbbe waarsjienlik eikes ingezaete van dae worm. Die haet ze mèt het graas opgegaete. En dan kumtj van het ein het anger. Het geit weer baeter mèt de vrouw. Of ze nog graas itj, zag het journaal neet. Mer as ze det waal duit, haet ze echt last van hersekrónkels.
2023, waek 36
