Ellie en ich höbbe allebei links en rechts ein huerapparaat. Zoeë kinne we ós nog ein bietje sjtäöndje haoje in gezelsjap. Mer det waertj sjteeds minder. Daoväor zègke miense soms: 'Kouptj uch toch ein sjterker apparaat, dan huertj gae weer baeter?' Die redenering geit neet op, want de oorzaak van sjlecht huere en de gevolge daovan zeen väör ederein angers. Dus Ellie kan niks aanvange mèt mien apparate en ich höb totaal niks aan die van Ellie. Sjterker nog, al huerdje we allebei sjlecht vanwaege hetzelfdje mankement, dan waas ich mesjien toch het bèst gebaatj bie ein goodkoup apparaat, terwiel Ellie juust ein hiel deur zooj mótte höbbe.
KNO-artse weite niks van huerapparate. Ze verwieze häör patiënte mèt de oetsjlaag van ein paar teste rechtsjtreeks door nao de huerwinkel. Dao verkoupe ze het leefst deur gerei, mer dao is de klantj neet altied het bèst mèt geholpe. Väördet Ellie zich ein huerapparaat ging aansjaffe, is het door de hoesarts doorverweze nao Adelante. Dao wèrke sjpecialiste die alles weite van huerprobleme, mer ouch van huerapparate. Ze advisere dich deskundig welk saort huerappaart het bèst bie dien probleem pestj. Mèt det advies geis se mèt ein geröstj hert nao de huerwinkel, want doe wèts precies waat se nuedig höbs.
Ellie kreeg ouch eine cursus aangebaoje: Ómgaon mèt sjlecht huere. De partners van de cursiste wore ouch welkom. Nao veer van de tiën lesse zeen Ellie en ich al hiël get wiezer äöver oos handicap. Ich mót good geconcentreerdj blieve, mer de väörige waek dwaaldje mien gedachte aaf nao ein mop die ich hiël lang geleje haaj gehuerdj. Van eine preester-liëraar nog waal woeë ich les van höb gehad. Ein bös mèt geistelike veróngelöktj óngerwaeges nao Lourdes. 65 pesjtuers en kaplaons kómme bie Sint Piëtrus aan. Dae zaet: 'Gae zultj allemaol waal Christelik gelaefdj höbbe. Dus ich höb mer ein vraog väör uch. Sjtaek allemaol de vinger op: Waem haet waal èns zondige gedachte gehadj?' 64 man sjtaeke väörzichtig eine vinger ómhoeëg. Piëtrus kniktj cóntent. 'Alle 65 iërlik, zeen ich. Loup mer door en neem dae douve dao achteraan ouch mer mèt.'
