26 jan 2021ColumnsFrits Criens

Column Modertaal, KAOLEHOK, door Frits Criens

Midden Limburg

In miene jónge tied wore de meisters op sjoeël neet misselik mét sjtraof. Ich zoot pas op de bewaarsjoeël. Op eine kwaoje mörge waerdje ich same mèt eine naef angerhalf oer opgesjlaote. In ein kaolehok zónger rame. Ik waas veer jaor, miene naef zoot in de iërste klas. Ein moder haaj zich beklaagdj bie de meister van miene naef. Wae twië zoje häör väör de gek höbbe gehaoje. Det waas gelaoge, ich kós die vrouw neet èns. Mien zeel waas väörgood bekratstj. Ich geluif det ich het thoes neet höb dörve te vertèlle en äöver mien sjmaerige kleijer zal ich waal gelaoge höbbe. Kaolehokke en sjtreng óngerwiezers besjtaon neet mier. Juust noe ze hel nuedig zeen, is det ein gemis. We kóste ze good gebroeke väör ós te besjerme taege viruswappies die zich nörges get van aantrèkke.

 

Ein paar waeke trök vertèldje mich eine miens mèt vol äövertuging det lètst miërt de pandemie väörbie waas. Ich zag: ‘Dao haoj ich dich aan.

’ Hae wis het zeker. Dan wore d’r, volges hem, genóg doeëje gevalle en waas de regering cóntent.'

Ich vroog woeëväör de regering zooj wille det d’r väöl doeëje vele. Dao kwoom gein anger antjwaord op as: ‘Lèt mer èns op, waat ich dich zègk.’ Dao kins se alle kantje mèt oet, behalve de goje. Toch is det geine achterlike miens, al sjleit hae in dit geval de plank falikant mis. Wie kan zoeë emes geluive det regering en deskundige, dokters en zorgpersoniël, inclusief de beeldje van de ic’s, ós al bekans ein jaor lang väör de gek haoje?

 

Wie kan het det emes dae in Haelen ein drökke homeopatiese praktijk haaj, mèt anger wappies geit demonstrere taege het coronabeleid? Det daezelfdje miens in Amsterdam väör tv-camera’s de groeëtste ónzin verköptj äöver corona en dokters? Wie kan het det geluivige d’rvan äövertuugdj zeen det zuuj neet besjmètj waere, ómdet häöre God häör besjermtj? Ich kan mer ein raeje bedinke. Die is waal driedeilig. A: Neet opgelètj op sjoeël; B: väöl te zaochte liërkrachte gehadj, en C: neet lang genóg väör sjtraof opgehoktj gezaete in ein kaolehok zónger leecht.

 

2021, waek 4

 

 

 

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.