As kindj waerdje ich aangetrokke door kerstsjtelkes. Neet alle hoeshaojes haje zo'n primitief óngerkómme bie of ónger de boum sjtaon. Wae thoes ouch neet, waat ich as kindj ein groeët gemis vónj. Wae haje waal beeldje, mer oos kerstgezelsjap sjtóng get verlaore op de gróndj ónger de boum, of op ein rouktäöfelke d'r naeve. Ich vónj det allebei oplossinge van niks. Of det gemis door mien moder kwoom? Die heel neet zoeë van kerstbuim opzitte. Beeldje hoofdje väör häör al gaaroets neet. Wie Ellie en ich getrouwdj zeen, kóste wae häöre beeldjegroep liëne. Dae höbbe we nog altied, as ein saort erfsjtök.
Ederein dae mich ein bietje kintj, wètj det ich twië linkerhenj höb. En toch höb ich het iërste jaor van oos huwelik eine kerstsjtal gemaaktj mèt ein rete daak. Det reet höb ich gesjneje langs ein ziep vlak bie het Kwaosvèn in Roggel. As se allewiel eine kerstsjtal köps -made in China- kins se in de henj klappe as dae de kerstmis alik äöverlaeftj. Mós se dan de sjtal zeen dae ich getummerdj höb. We zeen miër as vieftig jaor getrouwdj en det sjtelke is d'r nog altied. Vakwerk van mich? Det dörf ich neet te bewaere. Ich dink iërder det Sint Jozef sjtiekem haet mèt getummerdj. Het óngerkómme is óngertösse get minder sjtevig gewaore, mer ich wacht mèt de renovatie tot d'r väör dit saort cultureel erfgood subsidie kumtj.
De gipse beeldjegroep woeë Jozef ein deil van is, haet miër geleje. We höbbe hem versjillendje jaore in de kelder opgesjlage en dao is de gips neet baeter van gewaore. Mer as het kiendje weer in het krubke ligktj en Maria en Jozef zitte aan weerskenj op de kneen naeve hem te baeje, vèltj de sjaaj neet op. Ouch neet die van de herders die mèt häör sjäöp en de hóndj get wiejer achteraaf sjtaon. Allein de nek van de kamiël van de drie käöninge is dudelik oeët gebraoke gewaest. De bräök kumtj zichtbaar oet de tied det plastiese chirurgie väör kerstsjtalbeeldjes väöral waerdje oetgeveurdj mèt bisonkit. Efeng, alvast eine zalige kerstmis allemaol, van Ellie en mich.
2025, waek 51
