Pas geleje mós ein waerdame nao het journaal aankondige det we nog lang flinke kans op raegel haje. Ich vertaal effe väör de voest eweg wie ze häör präötje begós: 'Ich weit neet wie het uch vergeit, leef kiekers, mer ich bèn dae raegel óngerhandj kótsmeug.' Ich sjtèl mich zoeë väör det die waervrouw zich dae daag duchtig haet geërgerdj. Mesjien haaj ze ein zomerklèdje wille koupe. Väör de zekerheid haaj ze thoes op de baromaeter in de hal gekeke. Alles prima. Daonao eine nate vinger in de lócht gesjtaoke väör te veule wie de windj zoot. Det waas ouch good. En ze haaj vief minute de wolke besjtudeerdj. Geine raegel óngerwaeges. Vol goje mood waas ze nao de sjtad gereje en ein half oer later leep ze zingendj de parkeergarage oet.
Dao ging het fout: ein óntiegelike bies (ein sjoor, zooj aome Piet zaliger zègke) haaj häör duchtig betrokke. De aard väör klèdjes te passe waas häör ram äöver en ze waas mèt liëlike króm zin weer heivers gereje. En dan mós die vrouw ein paar oër later, ocherm, ouch nog sjlechte waersberichte aan de miense verkoupe. Det waas häör teväöl gevraogdj. Het is begriepelik waat ze deej, mer het kan eigelik neet. Het noets en ouch de waersverwachtinge besjtaon oet zakelike informatie. En die mót objectief gepresenteerdj waere. Angers waertj het eine póppekast. Ich huer het de noetslaezers van het journaal al verkondige:
De planne mèt vleegveldj MAA zoje good zeen väör Limburg. Ich dink det wae het same èns zeen, leef kiekers, det die klötsköp van de politiek zich mótte sjame. Of: Op de Olympiese Sjpele geit het zjwumme in de Seine definitief door. Ich sjtèl väör, leef kiekers, det we Macron ein waek väör het begin in het water goeëje. As hae bie de äöpening van de Sjpele nog gezóndj is, verklaore we het water veilig. En as lètste: De käöning geit volgendj jaor op bezeuk nao Afrika. Waat mich betruftj, leef kiekers, moge ze hem dao haoje. En dan noe door nao het waer. As het aan mich ligktj ... völ zelf mer in.
2024, week 24
