Aaf en toe kómme d’r op facebook foto’s naeve oet de tied det ich kindj waas. Van de kindjsheidoptocht in Haelen beväörbeeldj. Dae waerdje georganiseerdj door de zösters van het kloeëster op Aldenghoor, same mèt hiel väöl vriewilligers oet het dörp. De bedoeling waas väör het werk in de missie ónger de aandacht van het volk te bringe. Het waas ein saort religieuze vastelaovesoptocht mèt väöral kinjer. Natuurlik waerdje d’r gein gekkigheid oetgebeeldj, mer taferele oet de missie. Het waord neger waas nog hiel normaal. Dus dao wore wages mèt negerkinjer die van eine blanke pater les krege. Of wages die oetbeeldje wie de heidene in Afrika of China laefdje. Erm, ónwetendj volk. Gelökkig wore d’r katholieke broeders en zösters väör die miense äöver de enig waore God te vertèlle.
Op sommige wages zote belangrieke figure van het katholiek geluif. Merteliere, mer ouch de Paus mèt zien kardinale. Of Jezus en de twelf apostele, de maagd Maria met eine houp anger maagde en ingele die de zaligheid van het geluif móste oetsjtraole. De meiste maedjes wore det ein paar jaor later troewes ram vergaete. De rol van Paus of Maria waas min of mier sociaal bepaoldj. Zelf höb ich het gebrachtj tot Zoeaaf, soldaot van de Paus, en nog ein trap hoeëger tot kardinaal. Mer väör ierlik te zeen, as kleuter van de bewaarsjoeël bèn ich as sjlaaf en dómme heiden begós. Dao bèn ich noeët gans äöverhaer gekómme.
De optocht waas ein religieus trèkplaoster väör Midde-Limburg. Nao aafloup wore op Aldenghoor de missiefiëste väör jónk en aod. Paters en begiene sjpaordje de miense aan väör zoeëväöl mäögelik sjlechte wien nao binne te sjödde. De opbringst waas väör de missie. Väör het gezaegeldj werk dao wore d’r troewes altied jónges en maedjes nuedig die preester wole waere, broeder of begien. Pesjtoëer en kaplaon lepe de hoeshaojes aaf väör missionarisse te ronsele. Bie ein tante van mich haje ze väöl jónges, allemaol aeve vengig en flot mèt de móndj. Wie kaplaon dao aanklopdje, vroog eine van die batrave: ‘De missie? Waat mótte we dao doon? Ape oet het kaore jage?’
2021, waek 35
