Verjäördaag zeen ein goudmien väör eine sjriever. Dao kwoom ich zaoterdig weer èns achter. Väöl miense sjnappe neet miër waat gaondje is in oos landj. Ze höbbe het geveul det recht waertj gekaldj waat krómp is. Det waertj weg gekeke woeë ingegrepe mót waere. Det läöges waere vertéldj woeë de waorheid baove water mót kómme. Ze höbbe het geveul det de wet neet väör ederein tèltj. Det mèt het recht gesjoemeldj waertj. As emes op eine aopebare waeg vieftiën kilomaeter te hel rietj, kriegtj dae persoeën ein proces. Det is jaomer geldj, mer eige sjöldj dieke böltj. Mer as demonstrante op diezelfdje plaats de waeg blokkere, kómme die dao óngesjtraofdj mèt weg. Ouch al haoje ze het verkiër op, make ze rotzooi en haole ze laevesgeviërlike sjtrapatse oet.
Woeëväör haoltj de politie de eine kiër alles oet de kast väör emes dae te hel rietj te pakke? En woeëväör kinne demonstrante aope en bloeët zich óngesjtraofdj de vot aafvaege aan wette en regels? Ederein is väör de wet geliek. Det het in de praktijk dök angers oetpaktj, veule iërlike miense as ónrecht. Maete mèt twië maote. Dao kumtj dan nog éns bie det de belastingbetaler dae zich waal braaf aan de wet hèltj, moog opdrejje väör de köste. Det veultj as döbbel ónrecht.
Ein vrouw haaj iërst geloesterdj en zag: 'Rutte reep pas det we in ein sjoeën landj woeëne. Haet dae sjtróntj in de uig? Politici mótte beveiligdj waere. Zeen homo's of Joede hie nog äöveral welkom? Das war einmal. Criminele make in de sjtaej bekans de deenst oet. Thoeszorg en jeugdzorg versjraole mèt de daag. Aan wachtlieste väör wueninge kumtj gein inj, óngerwies waertj sjlechter, bejaarde kriege neet de hulp die ze nuedig höbbe. Ein sjoeën land? Wie lang nog? En väöral: väör waem? Kaag, Hoekstra, Kuipers en binnekort Rutte vluchte neet väör niks nao het boetelandj. Zoeë sjoeën is het hie al lang neet miër.' Wie ze zjweeg zag de jäörige: 'En dan vraoge ze zich in Den Haag aaf woeëväör Wilders zoeëväöl sjtumme trèktj.' Het waas ein laevendjig fiëst, al waerdje de probleme neet opgelostj.
2024, waek 11
