Alles kin in Lin. Det waerdje dudelik bie 100 jaar Stuw Linne. Zoeë loedje de titel van het fiëst woeëmèt herdachtj waerdje det käöningin Wilhelmina op 20 oktoeëber in 1925 nao Lin kwoom väör de iërste sjtuw en sjloes in de Maas in gebroek te sjtèlle. De boewwerke ligke in Oosdje, tösse Lin en Hael. Het raegeldje de ganse daag aan ein sjök door, van ein fiëst kwoom neet väöl terecht. De käöningin mook zich mèt Prins Hendrik en Prinses Juliana nao de ceremonie flot eweg nao Mesjtreech. Det mós hóngerd jaor later waere goodgemaakt, vónj Piet Evers zaliger.
Het waas zien idee óm väör de jäörige sjtuw ein groeët iëwfiëst te organisere. Zien gedachte dao-achter waas väör de Linner geist weer tot laeve te bringe. Het sjtraolendj hoeëgtepuntj van het fiëst zooj ein groeët toniëlsjtök in de aope lócht zeen. Hae vroog mich det sjtök te sjrieve en Johan Korten väör het te regissere. Ein toniëlsjtök sjrieve äöver ein sjtuw? Die vraog is mich dök gesjtèldj. Piet en ich wore d'r flot oet wie hae vertèldje det neet allein die äöpening waas taegegevalle, mer det d'r in de väöraaf-gaondje tiën jaor väöl miër waas misgegange mèt het project. 'Het liektj of d'r eine vlook op Oosdje rösjde.' zag hae. Det waas väör mich ein gouw opmerking. Mer waem haaj Oosdje vervlooktj?
Äöver de doeëdkranke gravin Emile van kesjtiël Oosdje haaj Piet al iërder vertèldj. Ze wool in Hael begrave waere, mer häöre man weigerdje det. Het kwartje veel: gravin Emile haaj Oosdje vervlooktj. Ich zoog het sjtök al gans väör mich. Mer dae vlook waas d'r nog altied. In de ganse väörbereiding van het project wèrkdje hae op allerlei manere taege. Zoeë erg det het fiëst bekans neet waas doorgegange. Mer toen sjtóng de Linner geist op. De familie Poels mèt aanhang zat d'r same mèt het besjtuur en ein leger vriewilligers de sjouwers ónger. En het lökdje. Het fiëst van 100 jaar Stuw Linne waerdje ein klaoterendj succes, mèt het sjtök De vlook van Osen as sjtraolendj hoeëgtepuntj. Piet kreeg ziene zin want Alles kin in Lin.
2025 week 41
