Ellie en ich wore mèt eine sjlumme breef nao het oetrope geloktj van de Jeugdprins van d'n Uul in Remunj. Dae middig waerdje dudelik woeëväör: oze kleinzoon Tijl waas de Adjudant van Prins Jimi I. Dae waerdje oetgerope in de hal van de Oranjerie. Die hal hètj in Remunj fiëstzaal, mer dan op zien Frans: Salle de fête. Efeng. Ellie en ich huere sjlecht en verdrage de decibels neet miër van de moderne vastelaovendj. Gelökkig waas d'r ein oplossing. Wae kóste baove op de äöverluip zitte in gemaekelike fauteuils. Vanaaf oos verheve zitplaats haje we ein prachtig oetzicht äöver de ganse Salle de fête. Of, in good Oranjerie-Remunjs, toute la Salle des fêtes.
Ich höb bekans sestig jaor as vastelaovesveerder mètgedaon. Dees reis waerdje ich verwindj mèt eine panorama-kiek äöver eine bóntje toervel miense van alle doon. Het plezeer in de vastelaovendj sjpetterdje van häör aaf. De Sjpraekbuus van d'n Uul zag precies wie het waas: Nao twië jaor van lockdown is ederein hiel hel toe aan deze vastelaovesmiddig. Het applaus leet huere wie groeët zien geliek waas. Ellie en ich höbbe genaote van ein sjieke ceremonie, aafgesjtumdj op de jeugd. Perfect georganiseerdj, mèt sjtiel en klasse en toch hiël gewuen. De jóng garde mèt Ule-Kukes van alle laeftieje leet zich kieke mèt danse, zinge, sjpraeke, presentere. Het oetrope van Prins Jimi I waas sjpeels en sjtielvol, net as de ganse ceremonie d'r róndjóm haer.
Natuurlik, wie Adjudant Tijl de proklamatie vol äövertuging oetsjprook, wore Ellie en ich ...nou ja. Net zoeë väöl höb ich genaote van ein kindj, ein maedje, ich sjat twië jaor aod. De ganse middig heel het zich op väör de buhn, dansdje op alle muziek mèt, sjleipdje mèt zitkösses, goof applaus en haet zich gein moment vervaeldj. Groeëter kinjer die hem wole helpe of sjture wimpeldje het resoluut aaf. Ouch door det kindj kós miene middig neet mier kapot. Dus ein dink weit ich zeker: ich höb de Jeugdprinses 2032 väör d'n Uul al in actie gezeen. As ze waertj oetgerope, moge ze Ellie en mich weer mèt eine sjlumme breef nao Remunj lokke.
2023, waek 5
