Väörige waek zunjig zoog ich de allerlètste minute van Zomergaste. Waem de zomegast waas, weit ich neet. Ich zoog nog net ein sjtökske van de film die daonao gans waerdje oetgezónje. Ein paar minute lang keek ich nao twië astronaute, maonmenkes. Ze probeerdje eine sjtein op te rape en mèt te neme. Het waas lestig väör op de bein te blieve. Valle waas gevierlik, dan kóste de maonpakke sjäöre. En det beteikendje de doeëd. Ich vónj het mer ónbeholpe gesjravel. En woeëväör? Waem is d'r mèt gedeendj det we de maon óngerhandj plat beginne te loupe?
Mesjien bèn ich te nuechter, of te dóm, of allebei. Al die vluchte nao de maon en nao mars interessere mich amper. Ich höb live op de tv gezeen wie Neil Armstrong as iërste miens eine voot op de maon zat. Det is natuurlik neet niks, mer ich waerdje d'r neet werm of kaod van. Aan mich is die ganse ruumdjevaart neet besjtaedj. Sjterker nog: in mien ouge is het weggegoeëdj geldj. Het heelal zitj óngertösse waal vol aafval en puin van veróngelökdje rakette, capsules, spoetniks, sateliete en angere rómmel. En waem die gevierlike rotzooi mót oprume wètj nemes. Waat höbbe wae miense in godsnaam op de maon te zeuke as we hie op de aarde de zake neet èns tegooj op orde höbbe?
En väör waem zeen de kostbaar gróndjstoffe op de maon? Raeken d'r mer op det 'belangrieke' lenj zich hie binnekort de köp inhouwe väör het antjwaord op die vraog. Aorlog dus, nog mier weggesjmete geldj det wae mótte ophooste. In het belang van ószelf natuurlik, det waertj ós dan waal mèt fiene kal wiesgemaaktj. Wieväöl miljarde, of zeen het al triljarde, zeen óngertösse de lócht in gesjaote? Väör väöl minder as de helft van det geldj zoje we hónger, elenj, ermood, analfabetisme en sjandalige óngeliekheid allang de waereldj oet höbbe kinne helpe. Mer det gebäörtj neet, want bie 'zoje höbbe kinne' huertj ouch de wil väör het te doon. Mer dae wil óntbriktj. De machtige die het väör het zègke höbbe, helpe de waereldj nog lever nao de maon.
2023, waek 32
