Kapel Onder de Linden in Thoeër veertj dit jaor häöre 350ste verjäördaag. Het is ein prachtige Mariakapel. As se d'r nog noeët bès gewaest, höbs se get gemistj. Ouch al bès se neet kèrks of geluivig. Het interieur is te sjoeën väör neet gezeen te höbbe. De kapel is ein bewies det de veriëring van Maria tot aan de jaore sestig ein belangrieke plaats haaj in het laeve van väöl geluivige Limburgers. Det is bezunjer, want Maria waas geine god. En toch zeen d'r periodes gewaest det gewuen miense miër tot Maria baedje as tot God. De kèrk haet zelfs geprobeerdj de veriëring van Maria de kop in te drökke. De Moder-Maagd waas bie het geluivig volk populairder as de ganse Drievuldigheid bie-ein. En det kós natuurlik neet in ein geluif woeë vrouwe nog altied neet getèldj zeen.
Maria waas as vrouw van vleis en blood de ideaal Middelares tösse geluivige en eine abstracte God. Dae heel zich in de ouge van gewuen miense allein doondje mèt groeëte en ingewikkeldje kwesties. Wie hel ze ouch baedje, God haaj geine tied väör zich bezig te haoje mèt de noeëd en het leid van ermoodzejjers. Mèt de probleme van ein moder. Mèt de gevolge van zjwaor ónwaer, eine sjlechte zomer of eine kwaoje wintjer. De aafsjtandj tösse de geluivige en God de Vader waas te groeët. Maria sjtóng tösse het volk op aarde en God in de hemel in. Het dunst bie Ziene Zoon, dae ouch häöre zoon waas. Dus baedje einvoudige geluivige tot Maria óm as Middelares häör probleme op ein röstige moment via häöre zoon väör te ligke aan de Vader.
Die probleme wore van allerlei aard. In de Kapel in het Zand in Remunj is eine ganse gank mèt dank-tegelkes. Dao-op sjteit te laeze woeëväör geluivige de hulp van Maria zoeë al inrepe. Väör genaezing bie zeekdjes, behaoje thoeskómst, äöverlaeving in de aorlog, probleme mèt relatie, sjteun bie exames en het haole van het riebewies. Eine hiel bezunjere dank vonj ich op het tegelke van ein vrouw. Die dankdje Maria det ze neet geopereerdj haaj hove te waere.
2023, waek 39
