Ellie en ich wore mèt oos aodste kleindochter in Tegele bie Het was Zondag in het Zuiden. Het verhaol is gans gesjreve róndj leedjes van Rowwen Hèze. Ein hiel gooj käös. De muziek - prachtig gezónge en gesjpeeldj - mèt daobie de glansrol van de Heilige Antonius moke het ein bezunjer sjtök. Ellie en oos kleindochter wore in de pauze nao de wc wie ein opvallendje vrouw nao mich haer kwoom. Ze droog ein kleid in alle kläöre van de raegenbaog det wie eine losse tentdook óm häör lief flakerdje. Häör haor wore kaal äöver de kop weggesjaore, woeëdoor de extreem zwaor oerhengers extra opvele. Häör luppe wore knalroeëd. Asof ze eine haan de kop haaj aafgebete, zooj mien vader gezagdj höbbe.
'Enne, waat vinjs se d'r van?' Ze waas väör mich volkómme vraemdj. Toch goof ich mien meining äöver het iërste bedrief. De vrouw haaj lichtelik anger commentaar verwachtj, want ze zag: 'Bès se krank?' Ich sjnapdje d'r niks van en vroog: 'Wie kums se daobie?' 'Ich höb dich nog noeët huere sjtute äöver ein oetveuring of ein väörsjtèlling. Egaal woeë we haer ginge.' Ich keek häör dónker aan en zag: 'Ich kan dich neet volge.' 'Bès se vergaete det we bekans ein jaor gevriedj höbbe? Des doe altied en äöveral get op aan te merke haads? Ein concert van The golden Earing, ein film of eine bóntje aovendj, niks dougdje väör dich. En äöver mien kleier haads se altied get te mekkere.'
'Ich dink echt det se de verkiërdje väörhöbs,' zag ich. 'Ich kin dich neet. En ich vinj dit ein prachtig sjtök. En troewes, ich mekker neet gauw örges äöver. Ich bèn hiel gemaekelik.' Of de vrouw het neet begreep? 'Doe, gemaekelik? As se det vreuger woors gewaest, haaj ich het neet hove oet te make. Ich waas gaer mèt dich doorgegange,' zag ze. 'Mer we höbbe noeët get mèt ein gehadj,' probeerdje ich het nog èns. Mien wäörd pakdje neet. 'Doe knaoterdjes mich te väöl, angers wore we getrouwdj gewaest.' Ich zuchdje deep en zag: 'Dan haads se in eder geval det kleid neet aangehadj.'
2023, waek 31
