Ellie en ich veerdje zaoterig oos gouw broelof. Mèt oos gaste natuurlik. Die 50 jaor wore eigelik al vol op 26 februari. Op dae datum zeen we in 1973 väör de wet getrouwdj. En det tèltj väör de Burgerlike Sjtandj. Väör de kèrk trouwdje we pas ein half jaor later, op 24 augustus. In de tössetied kochte we ein hoes waat we nao oze sjmaak höbbe opgeknaptj. Det ging in dae tied nog. Hoeze zat. En betaalbaar. Dus we zote ein poeës geleje mèt de vraog: vere we het fiëst op 26 februari of 24 augustus? We wole wet en kèrk neet väör de kop sjtoeëte, en bedachte ein kompromie. Net zoeë wie det dök in het huwelik geit. Van de wet pakdje we het getal van de trouwdaag, van de kèrk pakdje we de maondj: 26 augustus. Äöver fieftig jaor doon we het precies angersóm.
50 jaor bie-ein. 'As man en vrouw, äöver berge en door dale, leef en leid deile,' wie de ambtenier dae ós trouwdje det zoeë sjoeën zag. We kóste d'r ós allebei niks bie väörsjtèlle. Mer as we trök kieke, ging het eigelik vanzelf. Bekans vanzelf, want dao wore natuurlik berge en ouch dale, dao waas leef en ouch leid. Woeë neet, laote we ós niks wiesmake. Ouch de kleinkinjer kóste zich niks väörsjtèlle bie ein goude huwelik en sjtèldje Ellie en mich de gekste vraoge. 50 jaor getrouwdj? Waat is det, wie geit det? Wie duis se det?
Ein gooj waek väor het fiëst wore we mèt de twiëling bie het Draaksjtaeke in Beesel. Väör het sjpel begós, lepe oos kleindochter en ich de tribune aaf. We kwome bekindje van mich taege. Ein van de dames en ich knoeveldje ós hertelik. Wie we trök op oos plaatse kwome, bleke die vrouw en ich naeve ein te zitte. We wore weer effe diek mèt ein. Oos kleindochter troewdje het neet. 'Oma, kiek dao, juust haaj opa die vrouw ouch al vast.' Het leef maedje mót waal hiël sjoew zeen gewaest det Ellie en ich die 50 jaor op het lètste moment neet zoje haole.
2023, waek 35
