Mam, mama, ma, ma'ke, mammie, moe, moeke, moesje, moder, meuderke, moder. Dit rieke wäörd is zeker neet cómpleet. Wie de meiste tale haet het Limburgs hiel väöl wäörd die zègke waem ós op de waereldj haet gezatte. Hie baove sjtaon allein mer nette terme, dao zeen ouch wäörd die get platter zeen. Ein daovaon kumtj oet Remunj en det mót hie väör de aardigheid ouch geneumdj waere: die Aaj. Het begrip moder ligktj geveulig, want de moder is heilig. Op dien eige mam moogs se kwaod zeen, äöver angermans mam höbs se dien fatsoen te haoje. As se det neet duis, kan det groeëte gevolge höbbe. Tot ruzie en knokpartieje aan toe.
Begin miërt waas de waereldj aeve te klein. Het ministerie van Binnelandjse Zake haaj ein wetsväörsjtèl in de maak väör het waord 'moeder' oet het bevolkingsregister te sjrappe. Moeder uit wie het kind geboren is, zooj mótte waere Ouder uit wie het kind is geboren. Het commentaar op de sociaal media waas neet mals. En ouch in gezètte, op radio en tv kwoom het landj in opsjtandj. Minister De Jonge trok ziene käötel flot in en kaldje äöver ein ónnuedige fout. Hae haaj natuurlik mótte kalle van doorgesjlage gekkigheid.
Het wäörd moder meuktj ouch deil oet van anger wäörd. Ich bén noe aan het sjrieve in mien modertaal die ich mèt de modermèlk höb binnegekrege. De rubriek woeë dit sjtökske in te laeze is, hètj zelfs Modertaal. Ein plantj woeë se sjäötjes väör noew plantje vanaaf haols, is de moderplant, ouch moorplantj. De Maas is in Limburg, Moder Maas. Aojer dames achter de tapkast waere dök vol leefde mam, moder of meuderke geneumdj. En dan is het dit jaor op zunjig 12 mei Moderdaag. Het is commercieel vernäökerie, van de angere kantj is het väör väöl miense ein prachtige gelaegenheid väör taege moder te zègke waat ze doorein vergaete te zègke. Wie erg ze häör moder waardere en wieväöl ze óm häör gaeve. Wie sjoeën het is väör die wäörd mèt ein klein of groeëte geste te óngersjtrepe, besefs se pas as se gein moder mier höbs.
