Oos modertaalwaord haof waertj sjtilaan weggeduudj door het AN-waord tuin. Dao zitj troewes ein verhaol achter. De väörvader van het waord tuin waas tune. In oos eige modertaal besjteit det nog as toën, oetgesjpraoke tösse toeën en toen in. Eine toën is ein ómheining óm ein sjtök gróndj, beväörbeeldj de haof. Zoeë haet väörvader tune dus in het AN promotie gemaaktj: van aafrastering van de haof, nao de haof zelf, tuin dus. Mer tuin is neet content mèt allein ein plek in het AN. Het waord zal en mót ouch oos modertaal verovere. Poetin- en Trumpsjtreke dus, gelökkig zónger geweldj. De enige die de verovering kinne taegehaoje zeen wae zelf.
As wae in oos eige modertaal allein mer kalle van haof is het flot aafgeloupe mèt tuin. Mer we neme wäörd oet het AN en anger tale dök zónger bezej äöver. Höbbe we dan neet in de gate det we ein sjtök van oos eigeheid weggoeëje? Det aojers en kinjer te gemaekelik, wie in eine polonaes, aanhäöke aan de taal van reklaam, leedjes, films, sjterre en influencers, de taal van sjoeël, tv, radio, internet. Zeker zeen we det, mer we dinke det we neet angers kinne. En mesjien is det ouch waal. Het AN is väör väöl eige modertaalspraekers de twiëdje modertaal gewaore, belangrieker as de eige modertaal. Dao zulle raodsvergaderinge in het Limburgs niks aan verangere, bèn ich bang.
Mótte we het vervlake van het Limburgs dan mer laote gewaerde? Nae. Laote we väör te beginne eige wäörd in iëre haoje die mèt oos sjwerdjes laeve te make höbbe. Door ze thoes te gebroeke en door te gaeve aan kinjer en kleinkinjer. Het zooj ouch bate as in de supermertj greuntje beväörbeeldj ouch mèt häöre lokale modertaalnaam waere aangebaoje. Prei en paor, uien en oje, wortele en maore, aardappels en aerpele, kool en moos, witte kool en kappes, boerenkool en krolmoos. Aoh jao, en 'een zak' väör det allemaol in te doon is ein toet of eine taot. Het is troewes baeter väör het miljeu zelf get mèt te neme van thoes: beväörbeeldj ein kalebas of ein flies.
2026, waek 9
