Ouch in de Limburgse dörpe versjraoltj het laeve in hoeëg tempo. Waat al langer in klein dörpe aan de gang waas, zitj zich door in groeëter plaatse. Sjmeed, sjnieder, sjoester, hiërekapper, klein laevesmiddele-zake en winkels in fourniture of hoeshaod-gerei zeen al bekans allemaol weg. Bekkers en sjlechters kinne neet aan opvolgers kómme. Cafés mótte ein väör ein sjloete. Banke laote häör klantje al langer in de kaoj sjtaon. Sjoeële mèt te min kinjer waere opgedoektj. Vereiniginge höbbe ein groeët tekort aan besjtuurders, leje en leiders. Tradities waere al minder in iëre gehaoje. In väöl parochies dreigtj sjloeting van de kèrk ómdet d'r bekans gein geluivige en ouch gein geistelike miër zeen.
Ich höb niks mèt de kèrk. Mer pas geleje huerdje ich in Cultureel Café de Bombardon in Heitse bezunjer noets. In Klein Paries en Ittervoort waertj op het ougeblik ein orgel opgeknaptj väör in 2024 in de kèrk van Heitse geplaatstj te waere. Jaomer genóg höb ich gein waeze van orgels, al kan ich good loestere nao orgelmuziek. Het instrument väör Heitse kumtj oet ein kèrk in Nijmegen en is róndj 1850 gemaaktj door eine beroemdje Belzje orgelboewer. Clerinx. In de kèrk van Nederwiërt sjteit ein absuluut toporgel van daezelfdje boewer. Groeëter as det van Heitse. Ómdet ze in Nijmegen per se wole det het orgel in ein kèrk terechtkwoom die neet zooj sjloete, gove ze het instrument väör niks eweg. En ómdet het kèrkgeboew van Heitse ein monument is, zal det neet licht gesjlaote waere.
Kinners mèt väöl versjtandj van orgels zègke det het instrument eine prachtige, rieke klank haet. As het is opgknaptj, kriegtj Heitse, en ouch de gemaendje Leudal, d'r ein histories, monumentaal kunstwerk bie. Het waertj dus neet altied allein mer minder in de dörpe. Hiel aaf en toe kumtj d'r get goods väör trök. Want het orgel is neet eksklusief väör mèsse op te loestere. Dao waere sjtraks ouch concerte gegaeve in de kèrk die volges kinners eine prima akoestiek haet. Allemaol prachtig noets, want goje muziek is noeët weg. En ein Clerinx-orgel bringtj eine sjmaak extra in het muzikale assortiment van Leudal.
2023, waek 10
