Mèt vrunj doorhaoje van Aod op Noew. Det höbbe Ellie en ich lang volgehaoje. In al die jaore det het niks kós joeke wie laat wae noejaorsnacht in bèd kwome, tikdje de tied door. Eders kier waas d'r weer ein jaor väörbie, twelf maondj, twiëenvieftig waeke, driehóngerd viefensestig daag. Ein zón jaor miër, dao merks se hiel lang amper get van. Mer as het dertig van die jaore achterein waere, is det get angers. Dan hooftj het allemaol neet miër zoeë hel. Dan is ein jaor äöversjlaon inèns aantrèkkelik. En det ein jaor, waere d'r twië. En väör se het wèts, zits se jaor in jaor oet thoeës same gezellig door te haoje. Te kieke nao de conference van eine conferencier dae het jaor väör alle thoesblievers humoristies taege het leecht hèltj. En dan zaes se taege ein: 'Ich mót d'r neet aan dinke det we noe nog örges tot half nacht zote door te haoje.'
Sjpannendj is angers, mer waem zaet det het laeve altied sjpannendj mót zeen? Net nao de Kerstmis krege Ellie en ich ein bezunjer Noejaorskaart. Het waas ein foto van eine vader mèt ziene zoon, gesjtuurdj door de zoon. Dae haaj mèt zien aojers hiel lang geleje as kindj van ein jaor of acht bie ós doorgehaoje. Zien vader waas in det jaor flink kaal gewaore. Dao begóste miër mansluuj in het gezelsjap last van te kriege. Det waas in het begin van de aovendj ein heftig óngerwerp van gesjprek. Sjoeëns de kinjer aan de angere kantj van de kamer mèt sjpelkes bezig wore, haaj de aafzender van de kaart oos gesjprek gevolgdj.
Wie de klok het Noejaor aankondigje, kreeg het jungske de lachers op zien handj wie hae taege zien vader zag: 'Pap, zalig Noejaor mèt de kop vol haor.' Op de foto die we van hem krege, wore hae en zien vader allebei glaad wie eine biljartbal. Zien haor waas hae kwiet, zien geveul väör humor nog neet. Det bleek oet het óngersjrift bie de foto:
Zalig Noejaor, ouch zónger haor
De bèste winse väör uch in Haelen, van dees twië Kale!
2024, waek 1
