Wie ich nog tennisdje zote we èns mèt zeve man op het terras van het tennispark in H. Dao waerdje ein tournooi gesjpeeldj. Het waas eine prachtige zomeraovendj, óm tiën oer waas het nog 24 grade. Ederein haaj flink gesjpeeldj en de dorst waas naovenandj. De meiste van ós haje vakantie en nemes dach aan heivers gaon. Zeve is het gelöksgetal, mesjien waas det dae daag mer good. Gaondje de aovendj waerdje de tónge losser en de kal royaler. Eine van de groep bleef aan het traktere en wool neet höbbe det emes angers ouch èns besjtèldje. Hae haaj d'r ein gooj raeje väör: pas geleje haje hae en zien vrouw häör viërtig jäörig trouwfiëst geveerdj. Det zag hae pas wie nemes van ós nog alik door de blaostest zooj zeen gekómme. Mer ze zagte allemaol det ze mèt de fiets wore, dus dan kan eine pils te väöl get minder kwaod. Waerdje gedachtj en gezagdj. Miene maot en ich wore troewes echt mèt de fiets.
Wie we de broedgom haje gefeliciteerdj en ein noew blaad beer op taofel waas gezatte, kwoom het fiëstverke pas tegooj los. Äöver de zaegeninge van het huwelik kwoom hae neet oetgesjtuudj. As hae zien vrouw neet haaj gehadj waas d'r niks van hem terecht gekómme. Dan waas hae allang begrave gewaest, kapot gegange aan de zäöp. Nae, het huwelik en zien vrouw wore het bèste waat hem waas äöverkómme. Die viërtig jaor wore zónger probleme väörbie gevlaoge. As hae het nog èns mós doon, zooj hae achterein weer zien jaowaord gaeve. En alles precies hetzelfdje doon as wie hae het haaj gedaon.
Eine van het gruupke, eine sjtillere man oet K. haaj zich dae lofzang aangehuerdj en kós zich amper inhaoje. 'Alles hetzelfdje äöverdoon?' vroog hae vol óngeluif. De broedegóm herhaoldje zien wäörd. 'Alles!' De man nipdje sjnoevendj aan zien glaas en vroog: 'Ouch det se ein paar maondj bie dien vrouw thoes bès weggewaest, nao det gek vroumes bie mich in de sjtraot?' Wie het precies is aafgeloupe? Ich waas in eder geval väör half twelf thoes. Mèt de fiets. Volledig nuechter.
2023, waek 6
