23 december is geine datum woeë-op we get bezunjers vere of herdinke. Toch haaj det gekindj. Want op 23 december 1888 sjneej Vincent van Gogh zien linkeroer aaf. Wie Van Gogh zichzelf verminkdje, waas hae gans van de wap door ein duchtige ruzie mèt de Franse sjilder Paul Gauguin. Pas de volgendje mörge brach de politie hem nao het zekehoes. Mer dao kóste de dokters det oer neet mier trökzitte. Het is ein tragies mer waor gebäördj verhaol. Det lètste kan van het kerstverhaol neet waere gezagdj. Wie sjoeën de legende äöver de gebaorte van Jezus ouch is, de Biebel (Matheüs en Lucas) haet ós dao altied ein oer mét aangenejdj. Det is neet net väör ein geluif det oet naam van de einig waore God kaltj.
Emes ein oer aannejje haet twië beteikenisse: emes mèt sjlauwe kal get wiesmake of bezeike. Mer ouch: emes väör sjöt zitte. Det lètste kumtj oet het óngerwies van hiel vreuger. Wichter die neet mètkóste en dóm foute moke, of dóm antjwaorde gaove, krege ein paar aezelsoere opgezatte. Ze sjtónge dus väör sjöt as domoren. Trök nao de Biebel. Het Heilig Book vertèltj neet allein äöver de gebaorte van Jezus, mer ouch äöver Ziene doeëd. Äöver de arrestatie die dao-aan väöraaf ging, vertèltj apostel Johannes det Piëtrus mèt ein zjwaard het rechteroer aafhoudje bie eine sjlaaf van de hoeëgepreester. Mer Jezus, zoeë sjrieftj de apostel, mook dae man weer op slaag baeter. Hae mót dus het oer d'r weer höbbe aangezatte.
Het verhaol klinktj mich te wónjerlik in de oere väör waor te zeen. Iërder is het weer zón väörbeeldj van wie de kèrk, mèt de Biebel in de handj, ós iëwelang mèt väöl sukses ein oer haet aangenejdj. Die formule wèrktj väör het geluif neet mier. Mer de reklaam haet dae aanpak äövergenaome. Ze haet het viere van de wónjerlike gebaorte van Jezus, woeë Kerstmis väör is bedachtj, ómgelaoge tot ein commercieel fiëst det äöver vrede zooj gaon. De mèsse waere neet mier opgedrage in de kèrk mer op plaatse woeë het geldj mót rolle. Dao gaon mich de oere van hange.
2025, waek 52
