2 aug 2022ColumnsFrits Criens

Column Modertaal: OPRIT door Frits Criens

Midden Limburg

Wie kóm ich van det jónk aaf! Zoeë te laeze kós dae kreet het gejaomer zeen eine hopeloze man dae de vriendin d'r vandoor is. Mèt ein collegaatje, ouch nog ein vrouw. Ze haet häör wicht van drie oet ein väörige relatie bie de man achtergelaote. Het kindj is nog neet praoper, sjmietj mèt aete en jengeltj de godganselike daag. De man zooj het jungske gaer zoeë flot mäögelik bie zien moder aaflevere, mer die is van de waereldj versjwunde. Mer nae, de zin kumtj neet oet de klaagzang van eine verlaote man. Ze kumtj oet de móndj van ein boerin woeë ich aerpele koch. De sticker op häöre trui dreigdje met: BOEREN OP OORLOGSPAD.

 

De vrouw zooj gaer verhoeze nao ein appartement in het dörp. Mer zoeë lang as zoon Bert vriegezel bleef, mós zuuj het hoeshaoje op de boerderie väör hem blieve doon. Bert waas eine nagel aan häör kist, eine klaerige mèt losse hendjes, dae äöveral moelderie mook. Dae haaj ein sjtrakke vrouwehandj mier as hel vandoon. 'Gaef hem gewuen op väör Boer zoekt vrouw,' rooj ich häör aan. Yvon vintj waal ein vrouw die hem de meister is.' Ze zuchdje. 'Bert geuftj niks óm vrouluuj. Óm jónges ouch neet,' zag ze d'r flot achteraan. 'Gelökkig neet. Det mós d'r nog biekómme.' 'Toch zooj ich Bert aanmelje bie Yvon Jaspers,' heel ich aan. 'As hie get van die happige, jóng dinger kómme logere die gaer boerin waere, zeetj gae binne de kortste kiere van hem aaf. Leefdje duit wónjere.'

Ze keek mich dónker aan. 'Wónjere? Neet bie Bert. Dae haet absoluut geine zin in seks.' Ich mós dinke aan miene lètste roman. De moder van Egidius Henne, de houfdpersoeën, haet hetzelfde probleem as de moder van Bert. Zooj ich häör op mien book wieze? Mesjien wool ze het waal laeze. Ze kós het op internet of in edere bookhanjel besjtèlle. Desnoeëds mèt mich rule väör € 21,50 aan aerpele. Mer de dreigendje sticker deej mich zjwiege. Ich haaj gein zin in eine woeste Bert dae mèt ziene traktor ein ker voelnis op mien oprit kwoom sjtorte.

2022, waek 31

 

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.