Ellie en ich wore lang geleje in Lourdes. Het sjtedje voldeej aan de verwachtige: väöl toeriste en winkels vol soeveneers mèt mariabeeldje en heilendj water. En natuurlik pelgrims die hoes en haard haje verlaote väör persuenlik het wónjer van ein genazeing te moge belaeve. Bernadette Soubirous det in 1858 Maria haaj gezeen in ein grot, haaj zien werk as religieus trèkplaoster perfect gedaon. Toch ging ich d'r mèt eine kater weg. Sjmiddes waas d'r ein processie van pelgrims die vol haop op waeg ginge nao de bronne mèt wónjerwater. Det water is eigewies en meuktj zelf waal oet of het ein wónjer verrichtj of neet. Dus bekans ederein haoptj vergaefs.
Langs de waeg sjtónge toeriste te kieke nao de processie mèt kranke en gehandicapte miense die gereje, gedrage of geduudj waerdje door professioneel begeleiders, vriewilligers, begiene en geistelike. In alle tale waerdje helop gebaedj tot Maria en waerdje leedjes väör häör gezónge. Het mook indrök op mich, het geluif van miense die Lourdes as lètste kans aangrepe väör genaezing. Ze mótte net as ich geweite höbbe det ze zichzelf väör de gek hele. Ich waerdje d'r sjtil en klein van. Toch kreeg de sjtoet van trieste pechveugel applaus van het publiek naeve de kantj. Ich veuldje mich óngemaekelik waere det ich bleef kieke nao zónne berg leid, asof ich mich sjtóng te vergape aan angermans ozel. Ich höb mich trökgetrokke, want ich sjaamdje mich en wis neet good raod mèt michzelf.
Zón geveul van sjaemdje höb ich ouch as ich nao de paralympics op tv kiek. Ich vinj het prachtig det d'r Olympiese Sjpele zeen väör sjporters mèt beperkinge. Det die mèt kinne doon mèt modern, aangepasdje aparatuur. Erkinning kriege, belangsjtèlling en aandacht van de pers. Det ze kinne laote kieke waat het laeve häör te beje haet, óndanks ein zjwaor handicap. En tegeliek sjaam ich mich det ich dao nao kiek. Wie det in miene kop wèrktj, weit ich neet. Nae, ich trèk mich neet trök, mer dwing michzelf väör te kieke oet bewónjering väör waat dees sjporters mèt talent en kaer door häöre wil kinne verrichte. Wónjere.
2026, waek 12
