We lieke deze zomer gesjtraoftj mét Biebelse plaoge. In het Book Exodus sjteit besjreve wie God de Farao van Egypte sjtraoftj mèt tiën plaoge, ómdet hae weigertj het volk van Israël vrie te laote. 1 Het water van de Niel verangertj in blood en de vèsse gaon doeëd. 2 Het landj waertj besjprónge door kwakkerte oet die rivier. 3 De sjtaof van de gróndj verangertj in mögke en luus. 4 Sjtaekvlege en vlege terrorisere het landj. 5 Het vië in Egypte krepeertj door besjmèttelike zeekdjes. 6 Miense en biëste kómme ónger de zjwaere te zitte. 7 Eine zwaore hagelsjtorm verenneweertj ougst, buim en vië. 8 Groeëte zjwerme sjprinkhane vraete het lètste greun kaal. 9 Het waertj drie daag zakkeduuster in Egypte. 10 Alle iërstgebaore kinjer en biëste sjterve.
Dao is neet väöl fantasie nuedig väör het verhaol van de Biebelse plaoge äöver te zitte nao oze tied. Allein wiltj God het volk van Israël en häör sympathisante noe neet helpe, mer sjtraove väör waat het weigertj te doon: iërlik kalle mèt het volk van Palestina väör det vrie te laote. Die vergelieking ligkj väör miense die geluive in God en Biebel väör de handj. Dink ich. De plaoge die het Opperweze dees reis inzitj, zeen neet de minste. Dink mer éns aan alle bosbrenj as gevolg van de hittegolve woeëmèt we de ganse zomer al waere geplaogdj. Aan het tekort aan water in oos landj det altied ein teväol aan water haaj. Aan de probleme mèt sjtiksjtof, CO₂, energie, dieke, sjtuwe en brögke. Aan het verdwiene van ónmisbaar insekte.
Det zeen d'r al vief. Of God het dees reis ouch bie tiën plaoge wiltj haoje? Dao kan ich neet äöver aordeile. Ich höb waal het idee det het d'r miër zeen. Mer laot ich het in dit sjtökse op tiën haoje, al gaon ich noe gein anger plaoge opneume. Dao zooj ich mich ein väöl te groeëte bóks mèt aanmaete. Mer dao zeen zeker laezers die väör zichzelf waal weite mèt welke plaoge de hemel ós nog miër haet opgezaaldj. Laot het de Hallo mer weite. Ich bèn benoewdj.
2026, week 36
