'As se het mich vreugs, zooj ich het neet doon.' De man keek de jóng vrouw aan en sjödje mèt ziene kop. Ze zote aan ein täöfelke sjuun väör mich. De vrouw keek de man hulpeloos aan, asof ze twiefeldje äöver ein antjwaord. Det kwoom d'r toch. 'Sorry, pap, mer ich höb het uch neet gevraogdj. Ich wool uch allein vertèlle woeë ich mèt zit. Dao zal ich zelf oet mótte kómme.' De vader kindje zien dochter langer as vandaag en bleef röstig. 'Det kloptj Frouke, mer ich dach det se mesjien verlaege zoots óm raod. Begrieps se?' Det begreep zien dochter, mer ze zag aeve good: 'Ich zit nörges óm verlaege, pap. Ouch neet óm raod. En as het waal zoeë waas, vroog ich het uch.'
Het klónk ein bietje nuetelik, asof de dochter d'r al sjpiet van haaj det ze häör vader in vertroewe haaj genaome. Dae drónk aan zien beer en mook ein proostendj gebaar nao zien dochter. 'Ich sjnap good, Frouke, det se d'r mèt zits. Daoväör wil ich dich helpe. Gewuen, ómdet se mien dochter bès. Vader bliefs se väör dien gans laeve, ouch al zeen de kinjer óngertösse ein iëwigheid de däör oet. Troewes, die kinjer blieve dien gans laeve dien kinjer, al zeen ze bie wieze van sjpraeke mèt pensioen. Aojers wille niks lever as det het häör good blieftj gaon. Daoväör goof ich dich óngevraogdj miene raod.'
Frouke bleef zien gedöldj beware, mer dudelik mèt meute. 'Mesjien, pap,' zag het väörzichtig, 'bèn ich waal aod en wies genóg väör zelf oet te make waat het bèste väör mich is. Tuntj uch ouch neet?' De vader nipdje nog èns aan ziene pils en zag: 'Ich dink det se dao geliek in höbs. Doe bès aod en wies zat. Mer ich bèn aojer en mesjien wiezer, höb in eder geval mier laeveservaring. Woeëväör zoojs se dao neet van wille profitere?' Frouke keek hem vraemdj aan. 'Wiltj gae det echt weite?' Hae knikdje. 'Pap, gae zeetj drie kiër van vrouw verangerdj. Zootj gae dan de juuste man zeen väör mich äöver Ramon te advisere?'
2023, waek 22
