Ich bèn waal väöl thoes, mer neet äöverdreve aktief in het hoeshaoje, behalve mèt sjtofzuge. Det mót tegooj, dus mèt äöverlègk gebäöre. Woeë begins se, waat duis se mèt de heukskes en de rendjes? Trèks se sjteul, taofels en anger obsjtakels aan de kant? Nums se de dörpels aan de boetekantj van de väör- en achterdäöre ouch in de gang effe mèt? En det sjpecialistewerk höb ich volledig in de vingers. Of eigelik in de kop, want ich kin de ideale aanpak druime. Op sommige plaatse kóm ich aldaag mèt de zuger, op anger plaatse èns per waek. Mer ein dink is zeker, woeë ich mèt de sjtofzuger bèn gewaest, kins se van de tapeite matte en vloerbedèkking aete.
Gae mótj d'r mer geine kal van make en het neet doorvertèlle. Väör se het wèts sjtaon hie vrouluuj op de sjtoep. Of ich ouch bie häör kóm sjtofzuge. Ich kan slecht 'nae' zègke, ouch al is sjtofzuge väör mich óntsjpanne werk. De hulendje moter wèrktj wie muziek op mien gemood en meuktj mich röstig. Soms doon ich zelfs mèt opzèt extra lang äöver ein kamer, väör mien positieve energie vrie te laote sjtruime. Mien herses griepe häör kans väör oet het gareel te sjpringe en beginne 'boete de doeës' te dinke. De prachtigste ideje kómme in mich op. Äöver de Sjöpping beväörbeeldj en het Óneidige Goddelike Plan. Woeëväör haet God ós neet gemaaktj mèt drie erm, vroog ich mich pas aaf.
De derde erm beväörbeeldj örges aan de achterkantj van de rögk. Dan kóste we ós fatsuunlik kratse, as we jäök haje. Mer in de gang dach ich det Hae ós baeter zónger jäök haaj kinne make. Dan waas dae ekstra erm neet nuedig gewaest. Van de angere kantj, dao is ouch gezónje jäök en dae wils se neet kwiet. Door het sjtofzuge bedach ich mich det God neet kontent kan zeen mèt Zien Sjöpping ómdet d'r eine houp zake fout loupe. Ich kan mich väörsjtélle det Hae d'r aaf en toe foeksewildj van waertj. Daoväör, as ich Hem eine goje raod moog gaeve: Dootj wie ich, gaotj sjtofzuge.
2023, waek 7
