Eine verkiërdje Slevenhiër, det klinktj as godslastering, mer is het neet. Zónne Slevenhiër besjteit echt, as kruutsbeeldj. Traditie is het det Christus aan het kruuts waertj aafgebeeldj mèt het gezicht nao rechts. Det zooj d'r mèt te make höbbe det de goje maordenier rechts van Hem aan het kruuts waas genaegeldj. Ich zooj dinke: dae goje maordenier waas al bekiërdj. Dus Slevenhiër haaj alle raeje väör nao links te kieke, nao de sjlechte maordenier. Mesjien haaj dae zich nog wille bedinke. Efeng, ze höbbe vreuger angers besjlaote en daoväör kiektj Jezus aan bekans alle kruutse nao rechts. Mer neet de Jezus aan het veldjkruuts in Sampert. Dao wiste ze vreuger al nao welke kantj de Verlosser mót kieke.
Sampert? Det is ein aod buurtsjap achter Neeritter, woeë noe industrieterrein is, langs de Napoleonsweg op, tot aan de A2. En aan de angere kantj van de waeg, richting Thoeër, ligktj ouch nog ein sjtökske Sampert. In het Nederlands hètj het gehucht Santfort. In good Limburgs is het Sampert. Ein kèrk haet Sampert noeët gehadj, waal ein veldjkapel die iëwe aod is, geneumdj nao Sint Anna, de oma van Jezus. Of die waal de goje kantj oet kiektj? Ze haje ouch ein geweljige sjötterie in Sampert. Opgerichtj op het lètst van 19dje iëuw, as aafsjplitsing van de sjötters oet Ittervoort.
Sint Anna bleek ein gooj besjermheilige. In 1914 wónne häör sjötters de Aoje Limburger. Vanwaege WO I kós Sampert het OLS pas in 1919 organisere. Of de duvel d'r mèt sjpeeldje, in 1939 haje de sjötters van Sint Anna opnoew de vogel aaf: de Aoje Limburger ging weer nao Sampert, net wie WO II oetbrook. Dees reis kóste de kampioene het fiëst pas in 1947 organisere. Vanaaf dae tied zoot de sjrik d'r good in as de sjötters van Sint Anna op het OLS ónger de sjeetboum sjtónge. Ederein waas d'r heilig van äövertuugdj: 'As Sampert de Aoje Limburger haoltj, kumtj d'r weer aorlog.' Wie de sjötterie in 1974 de buks väörgood weghing, waas mennigein blie. Sommige wiste zelfs zeker det de verkiërdje Slevenhiër dao de handj in haaj gehadj. Efeng.
2023, waek 41
